चीनबाट स्वास्थ्य सामग्री लिएर आयो विमान

१६ चैत्र, काठमाडौं । कोरोना भाइरसविरुद्ध आवश्यक स्वास्थ्य सामग्री लिन हिजो चीनको गोन्जाओ उडेको नेपाल वायुसेवा निगमको विमान बिहान काठमाडौं फर्किएको छ ।

स्वास्थ्य सामग्रीका साथ बिहान साढे ५ बजे उक्त विमान काठमाडौंस्थित त्रिभुवन अन्तर्राष्ट्रिय विमानस्थलमा अवतरण गरेको हवाई उड्डयन प्राधिकरणले जनाएको छ । विमानमा कोरोना परीक्षण किट, चिकित्सकको सुरक्षा सामग्री पीपीई लगायत रहेको स्वास्थ्य मन्त्रालयका पदाधिकारीले जनाएका छन् ।

जहाजमा स्वास्थ्य मन्त्रालयले मगाएका सामान छन्– मन्त्रालयका प्रवक्ता डा.विकासराज देवकोटाले भने । जहाजमा करिब १३ टन स्वास्थ्य सामग्री र अन्य सामान समेत आयात गरिएको प्रवक्ता डा. देवकोटाले जानकारी दिएका छन् ।कोरोना संक्रमण परीक्षण किट, पीपीई लगायत एन ९५ मास्क, गगल्स, गाउन , पञ्जा र ज्वरो नाप्ने थर्माे गनसमेत रहेको उनले बताए ।