पाँचौ संक्रमितको उपचार बाग्लुङमै

१६ चैत्र, बाग्लुङ । नेपालमा कोरोना भाइरसबाट संक्रमित भएकी बाग्लुङकी किशोरीको आजबाट स्थानीय धौलागिरी अञ्चल अस्पतालमै उपचार शुरु भएको छ । हिजो मात्र पाँचौं संक्रमितको सूचीमा परेकी ती किशोरी बेल्जियमबाट दोहा हुँदै कतार एयरको जहाज चढी चैत ६ गते नेपाल आएकी थिइन् ।

काठमाडौं फर्किएलगत्तै उनी पोखराको उडान भर्दै सोही दिन माइक्रोबस चढेर बाग्लुङ पुगेकी थिइन् । अस्पतालका निर्देशक विनोदबन्धु शर्माका अनुसार, संक्रमित किशोरीको स्वास्थ्य अवस्था सामान्य छ । हाललाई उनको उपचार यहीं गर्ने निधो गरिएको छ, तर बीचमा कुनै समस्या आएको खण्डमा पोखरा वा काठमाडौं पठाउने तयारी भईरहेको जानकारी पनि डा. शर्माले दिएका छन् ।

आवश्यक प¥यो भने तत्कालै पठाउनका लागि एम्बुलेन्स लगायत स्वास्थ्य सामग्री तयार राखेका छौं भन्दै डा. शर्माले विरामीको अवस्था सामान्य रहेकाले आत्तिनु नपर्ने बताएका छन् । संक्रमित किशोरीसँगै अरु दुईजना पनि बेल्जियमदेखि नै आएका थिए ।

उनीहरुको रगतको नमूना परीक्षण गर्दा समस्या नदेखिएको तर थ्रोट स्वाब अर्थात घाँटीको ¥यालको समेत परीक्षण गर्न आज नमूना संकलन गरिएको उनले जानकारी दिएका छन् । साथै उनीहरुसँग यसबीचमा सम्पर्कमा आएकाहरुको समेत स्वास्थ्य परीक्षण गर्न स्थानीय निकायलाई आग्रह गरिएको जानकारी डा. शर्माले दिएका छन् ।