शारीरिक सक्रियता कायम राख्न डब्ल्यूएचओकाे आग्रह

१८ चैत्र, काठमाडौं । कोरोना भाइरसको रोकथाम र नियन्त्रणका लागी नेपालमा यति बेला लकडाउन गरिएको छ । यो बेला घरमै बस्दा पनि शारीरिक सक्रियता भने कायम राख्न विश्व स्वास्थ्य सङ्गठन ‘डब्ल्यूएचओ’ ले आग्रह गरेको छ ।

लामो समय बसिरहँदा शरीरमा अर्को समस्या आउन सक्ने भन्दै घरभित्रै गर्न सकिने शारीरिक कसरत गर्न सङ्गठनको आग्रह छ । अहिले घरमै बस्दा धेरैले टेलिभिजन हेर्ने, मोबाइल–कम्प्युटर बढी चलाउने, पुस्तक पढ्ने जस्ता काममा दिन बिताइरहेको भन्दै विश्व स्वास्थ्य सङ्गठनले हरेक २० देखि ३० मिनेटको अन्तरमा उठेर पाँच मिनेटसम्म शरीर तन्काउने, घर वरिपरि वा सिँढीमा तलमाथि गर्ने, बगैँचा वा वरिपरि घुम्ने गरेमा स्वास्थ्य सुधार हुने बताएको छ ।

हरेक दिन शरीरलाई सक्रिय बनाउनको लागि एउटा तालिका बनाइ घरमै गर्न सकिने व्यायामहरु गर्न पनि विश्व स्वास्थ्य सङ्गठनले आग्रह गरेको छ । सम्भव भएमा साथीहरु अनलाइनमा जोडिएर व्यायाम गर्न र नसकिएमा पनि दैनिक एउटा निश्चित समय व्यायामका लागि छुट्याएर पालना गर्न भनिएको छ ।

यो समयमा घरमा भएका परिवारको साथ सक्रिय हुन र साथीहरुसँग सञ्चारका माध्ययमबाट सम्पर्कमा रहिरहन आग्रह गर्दै विश्व स्वास्थ्य सङ्गठनले यो समय परिवारसँगै बगैँचामा हिँड्ने, साइकल चलाउने, आराम गर्ने, मिलेर खाना बनाउने गरेमा शारीरिक र मानसिक दुवै स्वास्थ्य ठिक रहने बताएको छ ।

परिवारका सबै सदस्यहरु दिनभर के गर्ने भन्ने योजना बनाउने, रचनात्मक काम गर्ने, नयाँ कुरा सिक्ने प्रयास गर्ने, यो कुरा गर्ने भनेर लक्ष्य बनाउने र पूरा गरे वा नगरेको छलफल गर्ने, केही दिनमा वा साप्ताहिक रुपमा घरमा बसेको समयमा के गरियो भनेर समीक्षा समेत गर्ने गरेमा मानिस दिक्क हुनबाट बच्ने र स्वस्थ शाक सक्रियताका साथै मानिसिक रुपमा रहने विश्व स्वास्थ्य सङ्गठनले जनाएको छ ।