विश्वभर कोरोनाबाट १९ लाख ९८ हजारभन्दा धेरै सङ्क्रमित

३ वैशाख एजेन्सी । विश्वव्यापी रुपमा फैलिएको कोरोना भाइरस ‘कोभिड-१९’ का कारण १९ लाख ९८ हजारभन्दा धेरै सङ्क्रमित भएका छन् । कोभिड-१९ बारे विश्वभरिको तथ्याङ्क सार्वजनिक गर्दै आएको वल्डोमिटरका अनुसार अहिलेसम्म यो भाइरसबाट १९ लाख ९८ हजार एक सय ११ जना सङ्क्रमित भइसकेका छन् ।

एक लाख २६ हजार ६ सय ४ जनाकाे ज्यान गएको छ ।सङ्क्रमितमध्ये चार लाख ७८  हजार ६ सय ५९ जना उपचारपछि निको भएका छन् भने १३ लाख ९२ हजार ८ सय ४८ जनाको उपचार भइरहेको छ, जसमध्ये ५१ हजार ६ सय ८ जनाकाे अवस्था गम्भीर छ ।

पछिल्लो एक दिनमा अमेरिकामा दुई हजार दुई सय ८४ जनाको ज्यान गएको छ भने २४ हजार दुई सय १५ नयाँ बिरामी थपिएका छन् । योसँगै अमेरिकामा कोरोनाका कारण २६ हजारको ज्यान गएको छ । त्यस्तै ६ लाख १३ हजार ८ सय ८६ जनामा सङ्क्रमण पुष्टि भएको छ ।

यस्तै पछिल्लो २४ घण्टामा बेलायतमा सात सय ७८ र फ्रान्समा सात सय ६२, इटलीमा ६ सय दुई र स्पेनमा तीन सय जनाको ज्यान गएको छ । जसका कारण इटलीमा २१ हजारभन्दा धेरै, स्पेनमा १८ हजारभन्दा धेरै, फ्रान्समा १५ हजारभन्दा धेरै र बेलायतमा १२ हजारभन्दा धेरैको ज्यान गएको छ । भारतमा एक दिनमा ३५ जनाको ज्यान गएको छ भने एक हजारभन्दा धेरैमा सङ्क्रमण देखिएको वल्डोमिटरले जनाएको छ ।