लकडाउनकाे समयमा भिडियो हेर्ने ह्वात्तै बढे

१९ बैशाख, काठमाडौं । नेपालमा कोरोना भाइरसका कारण लकडाउन भएपछि डेटा प्रयोग गर्नेहरूको सङ्ख्यामा उल्लेख्य वृद्धि भएको दूरसञ्चार प्राधिकरणले जनाएको छ । लकडाउन अगाडिको समयमा भन्दा अहिले खासगरी भिडियोे हेर्ने प्रयोगकर्ताको सङ्ख्यामा वृद्धि भएको दूरसञ्चार प्राधिकरणले जनाएको हो ।

प्राधिकरणका अध्यक्ष पुरुषोत्तम खनालका अनुसार लकडाउनको समयमा “युट्यूब हेर्ने र भिडिओ गेम खेल्ने प्रयोगकर्ता धेरै बढेको देखिन्छ । त्यसपछि फेसबुक, इन्स्टाग्राम, टिकटकजस्ता सञ्जालहरू धेरै प्रयोग भएका छन् । लकडाउनपछिको तथ्याङ्क हेर्दा ७५.६ प्रतिशतले युट्यूब, ७४ प्रतिशतले फेसबुक, ४० प्रतिशतले इन्स्टाग्राम अनि १८ प्रतिशतले टिकटकका प्रयोगकर्ता बढेका छन् ।

नेपाल टेलिकम, एनसेल, स्मार्ट टेलिकम लगायतका सबै दूरसञ्चार प्रदायक कम्पनीको तथ्याङ्क हेर्दा लकडाउनअघि र पछिको समयमा मोबाइल डेटा र भ्वाइस (फोनकल) मा पनि निकै परिवर्तन आएको छ । अहिले लकडाउनका कारण सबै मानिस घरमै रहँदा फोन गर्नुपर्ने आवश्यकता कम भएको छ । विद्यालय र धेरैजसो कार्यालय बन्द छ । खासगरी बालबालिकादेखि वयस्कसम्म सबैले मोबाइल वा अन्य ग्याजेटमा इन्टरनेट चलाउँदा डेटाको खपत बढेको छ ।

मानिसहरू फोनबाट भन्दा इन्टरनेटमार्फत् चलाइने भिडियो कलहरूमा अभ्यस्त हुन थालेकाले पनि भ्वाइसमा भन्दा डेटा प्रयोगकर्ता बढ्न थालेको नेपाल टेलिकमका प्रबन्ध निर्देशक डिल्लीराम अधिकारीले बताए । सरकराले लागु गरेको लकडाउनमा घरमा बस्ने अधिकांशले मनोरञ्जनात्मक भिडियोहरू वा सामाजिक सञ्जाल धेरै चलाउने गरेका छन् ।