पूर्व आईजीपी खनालसहित सांसदद्धय बस्नेत र श्रेष्ठविरुद्ध अपहरण मुद्धा दायर

२२ बैशाख, काठमाडौं । अन्तत: प्रधानमन्त्री केपी शर्मा ओलीकै निर्देशनमा भएको भनिएको सांसद अपहरण मुद्धा आज दर्ता भएको छ । जनता समाजवादी पार्टीका सांसद डा. सुरेन्द्र यादवले दिएको अपहरण तथा शरीर बन्धक मुद्धाको जाहेरी सरकारी वकील कार्यालय काठमाडौंले दर्ता गरेको हो ।

दर्ता न. १०४७ रहेको अपहरण तथा शरीर बन्धक मुद्धामा नेकपाका सांसदद्धय महेश बस्नेत र कृष्णकुमार श्रेष्ठ ‘किसान ‘तथा पूर्वआईजीपी सर्बेन्द्र खनालका विरुद्ध किटानी जाहेरी परेको छ । समाजवादी पार्टीका सांसद सुरेन्द्र यादवले आफूलाई अपहरण गरेको भन्दै यसअघि महानगरीय प्रहरी परिसर काठमाडौंले जाहेरी लिन नमानेको विषयमा सरकारी वकिल कार्यालयमा उजुरी गरेका थिए। सरकारी वकिल कार्यालयले उजुरीको अध्ययन गरि दर्ता गर्ने बताएको थियो।

सरकारी वकिल कार्यालयले अब काठमाडौं प्रहरी परिसरलाई जाहेरी दर्ता गरि आवश्यक अनुसन्धान अगाडि बढाउन निर्देशन दिने छ। सरकारी वकिल कार्यालयले जाहेरी दरखास्तको सक्कलीप्रति प्रहरी कार्यालयलाई पठाउने छ। यसअघि महानगरीय प्रहरी परिसर काठमाडौंका साथै सरकारी वकिलको कार्यालयले पनि जाहेरी लिन मानेका थिएनन्। यादवको टोलीले मानव अधिकार आयोगमा समेत उजुरी दर्ता गराइसकेको छ ।

सोमबार नै यादवले आरोप लगाएको तीनजनाको टोलीले पनि मानव अधिकार आयोगमा निवेदन दिएका थिए । पूर्वप्रहरी महानिरिक्षक सर्बेन्द्र खनालसहित सांसद किसान श्रेष्ठ र पूर्वमन्त्री महेश बस्नेतको टोलीले निवेदन दर्ता गराएका छन् ।

मुलुकी फौजदारी कार्यविधि संहिता, २०७४ को दफा ५ मा जाहेरी दर्खास्त वा सूचना प्रहरीले दर्ता नगरे सरकारी वकिलको कार्यालयमा उजुरी गर्न सकिने व्यवस्था छ । र, उजुरी प्राप्त भएपछि सम्बन्धित सरकारी वकिलको कार्यालयले त्यसको अभिलेख राखेर जाहेरी दर्खास्त वा सूचना आवश्यक कारबाहीका लागि सम्बन्धित प्रहरी कार्यालयमा पठाउनु पर्ने व्यवस्था छ ।