पर्सामा सेना परिचालन

३० बैशाख वीरगञ्ज । कोरोना संक्रमितको संख्या बढेसँगै जिल्ला प्रशासन कार्यालय पर्साले जिल्ला शिल गरेको छ । साथै नेपाली सेना परिचालन गर्ने निर्णय गरिएको छ । एकै दिन ३९ जना संक्रमित भेटिएपछि जिल्ला प्रशासन कार्यालयले औषधी उपचार र अन्य अत्यावश्यक कामबाहेक कुनै पनि व्यक्ति घर बाहिर निस्कन नपाउने गरी शिल गरेको हो ।

जिल्ला प्रशासन कार्यालयले सूचना जारी गरी कोरोना संक्रमण रोकथाम एवं नियन्त्रण गर्न तथा जिल्लामा शान्ति सुव्यवस्था कायम गर्न धेरै संक्रमण भएका र अति जोखिममा रहेका स्थानमा नेपाली सेना परिचालन गर्ने निर्णय गरेको छ ।

सिल भएसँगै शान्ति सुरक्षा, स्वास्थ्य, खानेपानी, दूध, विद्युत, दमकल, सञ्चार, भन्सार, आईसीपी, क्वारेन्टाइन, फोहोरमैला व्यवस्थापन, इन्धन, एम्बुलेन्स र औषधिजस्ता अति आवश्यक सेवाबाहेक सबै पसल, उद्योग, व्यवसाय र सेवा बन्द गर्ने निर्णय गरिएको छ । पर्सामा मंगलबार मात्रै ३९ जनामा संक्रमण पुष्टि भएको थियो । जसमा २ जना पत्रकार पनि छन ।