संक्रमित युवकको सिधा सम्पर्कका आमाबाबुसहित २३ जनाको स्वाब रिपोर्ट नेगेटिभ

◊ धीरुभाइ

१ जेठ, सप्तरी । सिधा सम्पर्कमा आएका सप्तरीका संक्रमित युवकका परिवारका सदस्यसहित २३ जनाको पीसीआर रिपोर्ट नेगेटिभ भेटिएको छ ।  सप्तरीको डाक्नेश्वरी नगरपालिका वडा नम्बर ३ हटेलका १८ वर्षीय संक्रमित युवकको सिधा सम्पर्कमा आएका उनका आमा, बुवा, हजुरआमा, चितवनबाट १३ जनाको समूहमा आएकामध्ये १२, क्वारेन्टाइनमा बसेको बेला क्वारेन्टाइनमा रहेका दुई, त्यहिबेला कपिलवस्तुबाट आएर क्वारेन्टाइनमा बसेका तीन, क्वारेन्टाइनका दुई जना प्रहरी र एक जना स्वास्थ्यकर्मी गरी २३ जनाको थ्रोट स्वाब संकलन गरिएको थियो ।

गत मंगलबार थ्रोट संकलन गरेको उनीहरुको पीसीआर परीक्षणको रिपोर्ट नेगेटिभ आएको स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए ।  गत २९ गते युवकमा कोरोना संक्रमण भेटिएपछि उनको सिधा सम्पर्कमा आएका २३ जनालाई सोमबारदेखि पातो स्थित चन्द्रकान्त क्वारेन्टाइनमा राखिएको थियो । तीमध्ये आमाबाबु, हजुरआमासहित चार जनालाई फेरी स्वाब संकलन गरी पीसीआर परीक्षण गर्ने बताउँदै उनीहरुबाहेक अन्यलाई क्वारेन्टाइनबाट घर पठाइएको जानकारी दिए ।

संक्रमितका सम्पर्कका थप २१ जनाको पहिचान

जिल्लाको संक्रमित युवकको ट्राभलिङ्ग हिस्टोरी (यात्रा बृतान्त)को अनुसन्धानले उनीसँग सम्पर्क आएर भेटघाट, गफगाफ गरेको प्रदेश, जिल्ला र स्थानीय गरी २१ जनाको पहिचान गरिसकेको उनले उनीहरुको पीसीआर परीक्षणको लागि स्वाब संकलन गरिने तयारी भइरहेको उनले बताए ।

खरैनीको मस्जिदमा नवाज पढ्दा संक्रमण !

चितवनमा मजदुरी गर्ने उनीसहित १३ जना पैदल हिँडेर घर फर्किने क्रममा पर्साको खैरनी स्थित मस्जिदमा नवाज पढ्न जाँदा त्यहीबाट युवक संक्रमित भएको यात्रा बृतान्तको अध्ययनले देखाएको स्वास्थ्य निमित प्रमुख यादवले जानकारी दिए । अहिलेसम्म युवकको यात्रा बृतान्त र सम्पर्क अध्ययनले मस्जिदबाट संक्रमण भएको उनले बताए ।

युवकमा संक्रमणको लक्षण छैन : अस्पताल
राजविराज स्थित गजेन्द्रनारायण सिंह अस्पतालको आइसोलेशनमा भर्ना गरिएको संक्रमित युवकको स्वास्थ्य अवस्था सामान्य रहेको अस्पतालका मेडिकल सुपरिटेन्डेन्ट डा. चुमनलाल दासले जानकारी दिए । पछिल्लो चारदिनदेखि भर्ना भएका युवकमा कोरोनाको कुनै किसिमको लक्षण देखिएको छैन उनले भने, आमस्वस्थ्य मानिस जस्तै देखिन्छ ।

युवकको संक्षिप्त घटना

गत बैशाख ९ गते लकडाउनका बेला संक्रमित युवक चितवनमा मजदुरी गर्ने उनीसहित १३ जना पैदल हिँडेर सप्तरी आइपुगेपछि उनीहरुलाई चन्द्रकान्त माविको क्वारेन्टाइनमा राखिएको थियो । गत २६ गते स्वास्थ्य कार्यालय सप्तरीले सो क्वारेन्टाइनमा समय अवधि पूरा गरेकोमध्ये स्याम्पलिङ्गको आधारमा उनको पीसीआर परीक्षणका लागि स्वाब संकलन गरेको थियो । स्वाब परीक्षणको रिपोर्ट नआउँदै उनलाई २८ गते घर पठाइएको थियो । २९ गते रिपोर्ट आउँदा उनमा कोरोना पोजेटिभ पुष्टि भएको थियो ।

जिल्लावासीमा त्रास कम

सिधा सम्पर्कमा आएका मानिसहरुमा कोरोना संक्रमण नभेटएपछि जिल्लावासीको त्रासमा कमि आएको छ । फेरी परिक्षण गर्दा रिपोर्ट नेगेटिभ नआएसम्म धेरै खुशी नभएपनि तत्कालको त्रासमा कमि आएको हो । संक्रमित बसोबास गरेको नगरपालिका, गाउँ टोलका मानिसले त्रास कम महशुस गरेको छ ।