करेन्ट लागेर दुई महिलासहित तीन जनाको मृत्यु

◊ धीरुभाइ

९ जेठ, सप्तरी । पछिल्लो तीन दिन यता विभिन्न स्थानका दुई महिलासहित तीन जनाको करेन्ट लागेर मृत्यु भएको छ ।
सप्तरीको बोदे बरसाईन नगरपालिका ९ सिम्रहामा बिहीबार करेन्ट लागेर एक महिलाको मृत्यु भएको हाे ।

घरमा मोबाइल चार्ज गर्ने क्रममा विद्युत् तार सर्ट भई करेन्ट लागेर रविन्द्रप्रसाद सदाको ४० वर्षिया श्रीमति मिरकुनदेवी सदाको मृत्यु भएको जिल्ला प्रहरी कार्यालय सप्तरीका प्रवक्ता प्रहरी नायब उपरीक्षक तिलक भारतीले जानकारी दिए ।

करेन्ट लागेर गम्भीर घाइते भएकी सदाको उपचारको लागि बोदे बरसाईन बजारस्थित जिवनदिप अस्पताल ल्याउने बित्तिकै अस्पतालले मृत घोषणा गरेको बताइएको छ । घटना सम्बन्धमा थप अनुसन्धान भइरहेको प्रहरीले बताइएको छ । यसअघि यसै साता दुई जनाको करेन्ट लागेर मृत्यु भएको छ ।

गत मंगलबार डाक्नेश्वरी नगरपालिका १० बस्ने ३५ वर्षीय रन्जितकुमार साह र गत बुधबार खडक नगरपालिका ३ बस्ने २२ वर्षीया बबिता कुमारी मण्डलको करेन्ट लागेर मृत्यु भएको थियो । साहलाई घरमा पानी तान्ने मोटर जडान गर्ने क्रममा र बबितालाई खेतमा घाँस काटिरहेकीको बेला करेन्ट लागेर मृत्यु भएको बताइएको ।