भीरकोटको अबरुद्ध हाटबजार सञ्चालनमा

११ जेठ, स्याङ्जा । कोरोना भाइरस (कोभिड १९) का कारण अबरुद्ध रहेको स्याङ्जाको भीरकोट नगरपालिकामा संचालित साप्ताहिक हाटबजार सामाजिक दुरी कायम गर्दै सञ्चालनमा ल्याईएको छ । गाउँगाउँमा उत्पादन भएका कृषि उपजलाई सहजरुपमा बजारसम्म पु¥याउने उद्देश्यले पुनः हाटबजार सञ्चालनमा ल्याईएको हो ।

झण्डै २ महिना अबरुद्ध बनेको हाटबजार सञ्चालनमा आएपछि कृषक मात्रै होईन बजारमा रहेका उपभोक्ता समेत खुशी भएका छन् । गाउँगाउमा उत्पादन भएको तर बजार नपाएको गुनासो बढेपछि हाटबजार सञ्चालनमा ल्याइएको नगरपालिकाका प्रमुख छायाँराम खनालले जानकारी दिए । उनका अनुसार गाउँगाउँमा उत्पादन बढेको र बजारका उपभोक्ताले नपाएको गुनासो आएपछि बजार संचालनमा ल्याईएको हो ।

हाटबजार दैनिक बिहान ९ देखि साँझ ४ बजेसम्म सञ्चालनमा आउनेछ तर खरिदबिक्री भने मध्यान्ह १२ बजेपछि मात्र हुने नगरपालिकाले जनाएको छ । कृषकको उत्पादन नगरपालिकाले खरिद गर्ने र होलसेल मुल्यको २ प्रतिशत राखेर नगरपालिकाले नै उपभोक्तालाई बिक्री वितरण गर्ने व्यवस्था मिलाईएको उपप्रमुख सीमा केसी कर्माचार्यले बताईन । कृषकले उत्पादन गरेका कृषिउपजहरु बिहान १२ बजे अगाबै हाटबजारमा ल्याउनुपर्ने र नगरपालिकाले बजारमा चलेको होलसेल भाउमा खरिद गरेर हाटबजारमा बेच्ने उपप्रमुख कर्माचार्यले बताईन ।

नगरपालिकाले नै कृषिउपज खरिद गरिदिने भएपछि आफूहरु निक्कै उत्साहित भएको स्थानीय कृषक बिक्रम केसीले बताए । उत्पादित बस्तुको बजार नपाएका बेला नगरपालिकाले नै खरिद गरिदिने भएपछि उत्पादनमा हौसला आएको समेत उनले सुनाए । हाटबजारमा दैनिक २ जना कर्मचारीले फलफुल तथा तरकारी किनबेच गर्ने व्यवस्था मिलाई हाटबजारलाई व्यवस्थित गरिएको छ । हाटबजारमा काक्रा, घिरौला, लौका, करेला, फर्सीहरु प्रशस्त मात्रामा रहेको नगरपालिका कृषि संयोजक तथा नगर प्रवत्ता दीपेन्द्र केसीले बताए ।

पछिल्लो समय भीरकोटका नगरबासिन्दा आफ्नो बाँझो खेतियोग्य जग्गालाई उपयोग गर्न थालेको वडा नम्वर ५ का यामप्रसाद अधिकारी ‘लक्ष्मण’ ले जानकारी दिए । बाँझो खेतीयोग्य जमिनमा ‘ब्लक एरिया’ मार्फत माटो सुहाँउदो आलू, मकै, धान खेती गर्ने निर्णय भएपछि नगरवासी कृषिमा उत्साहित भएर लागेको उनले बताए ।