सप्तरीमा संक्रमति संख्या ६९ पुग्यो, थप १३ जनामा कोरोना पुष्टि

धीरुभाइ

२२, जेठ सप्तरी । स्वास्थ्य कार्यालय सप्तरीले जिल्लामा बिहीबार थप १३ जनामा कोरोना संक्रमण पुष्टि भएको जनाएको छ । योसँगै जिल्लामा कूल संक्रमितको संख्या ६९ पुगेको छ । आज थपिएका संक्रमितहरुमा जिल्लाको हनुमाननगर कंकालिनी नगरपालिकामा छ, छिन्नमस्ता गाउँपालिकामा पाँच, राजविराज नगरपालिकामा एक र शम्भुनाथ नगरपालिकामा एक जना रहेकोे स्वास्थ्य कार्यालय सप्तरीका निमित प्रमुख दुनियालाल यादवले जानकारी दिए ।

उनीहरु बसै जना भारतको विभिन्न स्थानबाट आएका पुरुष रहेका छन । अहिले उनीहरु सम्बद्ध स्थानीय तहको क्वारेन्टाइनमा रहेको बताएको छ । एकसाता अघि स्वास्थ्य कार्यालयबाट खटिएको टोलीले उनीहरुको स्वाब संकलन गरी पीसीआर परीक्षणका लागि धरान स्थित बीपी कोइराला स्वास्थ्य विज्ञान प्रतिष्ठान घोपाको कोभिड १९ परीक्षण प्रयोगशाला पठाइएको थियो ।

संक्रमितहरुलाई राजविराज स्थित साईकृष्णा अस्पतालको आइसोलेसनमा ल्याउने तयारी भइरहेको गजेन्द्रनारायण सिंह अस्पतालका मेडिकल सुपरिटेन्डेन्ट डा. चुमनलाल दासले जानकारी दिए । जिल्लामा हालसम्म भारतीय सीमासँग जोडिएको डाक्नेश्वरी नगरपालिकामा १२, बोदेबर्साइन नगरपालिकामा १९, राजगढ गाउँपालिकामा १३, हनुमाननगर कंकालिनी नगरपालिकामा छ जनामा संक्रमण पुष्टि भएको छ । त्यस्तै राजविराज नगरपालिकामा पाँच, बलान बिहुल गाउँपालिकामा चार, सुरुङ्गा नगरपालिका, खडक नगरपालिका, तिरहुत गाउँपालिका र विष्णुपुर गाउँपालिकामा एक÷एक जना संक्रमित रहेको स्वास्थ्य कार्यालयका निमित प्रमुख यादवले बताए ।