तलब माग्दा जागिर गयो

♦ प्रकाश डोटेल

२५ जेठ, काठमाडौं । स्याङ्जा सदरमुकामस्थित एक सहकारीका कर्मचारीले तलब माग्दा जागिर गएको छ । पुतलीबजार नगरपालिका १ ठाडोलाईनको साहारा वचत तथा ऋण सहकारी संस्था लि.मा कार्यरत यानी गुरुङ्ले बन्दाबन्दी अवधिको तलब माग्दा जागिर गएको हो ।

“बन्दाबन्दीको अवधिमा कार्यालय खुलेको थिएन् तर घर चलाउन समस्या भएपछि तलब मागेको थिएँ ।” गुरुङ्ले भनिन्, “धेरै प्रयासपछि तलब त पाएँ तर तलब दिएपछि अबदेखि कार्यालयमा नआउनु भनिदिए ।” करिब १० महिनादेखि संचालित सहकारीमा गुरुङ् करारमा बजार प्रतिनिधिका रुपमा कार्यरत थिईन् ।

“सरकारले बन्दाबन्दी लागु गरेपछि पूर्णरुपमा कार्यालय बन्द भएको थियो ।” सहकारीका सचिव तथा कार्यालय व्यवस्थापन प्रमुख श्यामकृष्ण श्रेष्ठले भने, “बन्द रहेको सहकारीले करारका कर्मचारीलाई तलब दिन नसक्ने भएपछि हालसम्मको तलब दिएर नआउनु भनेका हौं ।”

स्थापना कालदेखिको कर्मचारी भएरपनि आफुलाई तलब माग्दा कार्यालय नआउनु भन्दा दुःख लागेको गुरुङ्ले सुनाईन् । “सहकारीहरुले कर्मचारीलाई जानकारी र स्पष्टीकरण बिना एक्कासी निष्काशन गर्न मिल्दैन् ।” जिल्ला सहकारी संघ लि. का पूर्व अध्यक्ष केशवराज लम्सालले भने, “जानकारी नदिएर कारण बिना कर्मचारी निकाल्नु अपराध हो ।”

शिक्षक सेवाबाट निवृत्त श्रेष्ठ शिक्षक सेवामा रहँदासमेत बिवादित व्यक्ति हुन् । सेवाबाट निवृत्त भएपछि श्रेष्ठ लगायतको अगुवाईमा जिल्ला सदरमुकाममै २ वर्षअघि स्थापित निवृत्त राष्ट्र सेवक सहकारीमा समेत श्रेष्ठले मनोमानी र आर्थिक अपचलन गरेको आरोप लागेपछि राजिनामा दिन बाध्य भएका थिए ।