गल्याङ नगरपालिकाका स्वास्थ्य प्रमुखको आत्महत्यामा नगर प्रमुखको संलग्नता !

२५ जेठ, स्याङ्जा । गल्याङ नगरपालिकाका स्वास्थ्य प्रमुख आइतबार झुन्डिएको अवस्थामा फेला परेका छन् । बिहानदेखी सम्पर्कबिहिन बनेका लिला भण्डारी साँझ करिब ४ बजे गल्याङ नगरपालिका-२ बटुवा भन्ने ठाउँमा राम्सिनको रुखमा झुन्डिएको अवस्थामा फेला परेका हुन् । उनको आत्महत्यामा गल्याङ नगरपालिका प्रमुख भूपराज अधिकारीको संलग्नता भएको घर परिवारले आरोप लगाएका छन् ।

नगरप्रमुख अधिकारले चरम प्रेसर दिएपछि शुक्रबार राजीनामा लिएर कार्यलय पुगेपनि उनको राजीनामा स्वीकृत नगरिएको गल्याङ नगरपालिका प्रशासकीय अधिकृत इश्वारीप्रसाद पाण्डेले जानकारी दिए । उनले भने, राजीनामा लिएर आएका थिए  तर हामीले स्वीकृत गरेनौं ।

गल्याङ नगर हस्पिटलका कर्मचारीलाई तलब नदिएको लगायतका काण्डमा नगर प्रमुख आफू राम्रो बन्ने र दोष जति उनै भण्डारी माथि थुपार्ने र भण्डारीलाई नगरपालिकाभित्र एक्लै राखेर गलत निर्देशन दिने र बाहिर आफू राम्रो बन्ने नगर प्रमुखको दबाब थेक्न नसकेको उनका घरपरिवारले जनाएका छन् । शुक्रबार राजीनामा लिएर पुगेका उनलाई धमक्याएर पठाइएको घर परिवारले आरोप लगाएका छन् ।

घटनास्थलमा पुगेका छोराले नगर प्रमुखलाई देख्न साथ मेरो बाउको हत्यारा यहि हो । मेरो बाउलाई प्रेसर दिएर आफू घुम्नी कुर्चीमा बसेर खाने । मेरो बाउको हत्यारालाई मार्छु भन्दै छोराले रुवाबासी गरेपछि नगर प्रमुख घटनास्थलबाट फरार भएका थिए । छोराले यस्तो कुरा सार्वजनिक गरेसँगै घटना रहस्यमय बनेको छ । मृतकको साथबाट एउटा १६ जीबीको पेनड्राइभ र एउटा कागज फेला परेको छ । लासलाई हाल पोस्टमार्टमको लागि वालिङ लगिएको छ ।