मोरङमा थप ९ जनामा कोरोना संक्रमण पुष्टि

२६ जेठ, विराटनगर । मोरङमा थप ९ जनामा कोरोना भाइरस संक्रमणको पुष्टि भएको छ । सोमबार मोरङको लेटाङ नगरपालिका र रतुवामाई नगरपालिकामा दुई र दुईजना र धनपालथान गाउँपालिकामा पाँच जनामा कोरोना संक्रमण पुष्टि भएको हो ।

लेटाङ नगरपालिकाका जनस्वास्थ्य अधिकृत महेन्द्र चौधरीका अनुसार नगरपालिकामा ३० र २९ वर्षीय पुरुषमा संक्रमण देखिएको छ । संक्रमित पुरुष जेठ चार गते आएका थिए । उनीहरुलाई क्वारेन्टाइनमा राखिएको थियो । धनपालथान गाउँपालिकामा पाँचजनामा कोरोना संक्रमण देखिएको छ ।

भारतबाट आएका तीन पुरुष, एक ३० वर्षीय महिला र १२ वर्षीय बालकमा पनि कोरोना संक्रमण देखिएको गाउँपालिका सिनियर अहेब ऋषिराज सेठले बताए ।

त्यस्तै रतुवामाई नगरपालिकामा थप दुईजनामा संक्रमण देखिएको प्रदेश १ को सामाजिक विकास मन्त्रालयले जनाएको छ । रतुवामाई नगरपालिकाका प्रमुख प्रशासकीय अधिकृत राजेन्द्र भट्टराईले सोमबार नयाँ संक्रमितका बारेमा आधिकारिक जानकारी आएको बताए ।

उनले आइतबार बेलुका दुई जनामा संक्रमण देखिएको जानकारी दिए । सोमबार ९ जना थप भएसँगै मोरङमा कोरोना संक्रमितको संख्या २८ पुगेको छ ।