प्रधानमन्त्री ओलीको गृहनगरमा एमसीसीविरुद्ध खबरदारी सभा

झापा संवाददाता

२७ जेठ, झापा । प्रधानमन्त्री केपी शर्मा ओलीको गृहनगर दमकमा नेपालका लागि नेपाली अभियानका अभियानकर्ताहरुले एमसीसीका बिरुद्धमा मंगलबार खबरदारी सभा गरेका छन् ।

नेपालका लागि नेपाली अभियानका झापा जिल्ला संयोजक महेन्द्र प्रसाई लगायत जिल्लाका अभियानकर्मीसहित दमकबासीको उक्त खबरदारी कोण सभामा उल्लेख्य सहभागिता रहेको थियो ।

नेपाली हामी रहौला कहाँ नेपालै नरहे भन्ने राष्ट्रिय गितको बोलसँगै शुरु भएको खबरदारी सभामा बोल्ने अधिकांश वक्ताहरुले एमसीसी नेपालको हितमा नरहेको बताएका थिए । नेपाली भूमीमा बिदेशीले गाडी गुडाउँदासमेत नदेख्ने वर्तमान सरकारलाई अमेरिकाले सित्तैमा दिन लागेको भनेर गलत प्रचार गर्दै विदेशी दाशता नेपाल भित्र्याउन लागेको आरोपसमेत लगाएका थिए ।

दमकको मुख्य केन्द्र गणतन्त्र चोकमा सम्पन्न भएको उक्त खबरदारी सभामा प्रधानमन्त्रिलाई अब चिर निन्द्राबाट व्यूझिएर देशको वर्तमान अवस्था र नागरिकको दैनिकीमा ध्यान दिन वक्ताहरुले सुझाएका थिए । एसीसी देशका लागि घातक भएकोले यो विधेयक सदनमा प्रस्तुत भए पनि आम नेपाली जनता सडकमा आएर यसलाई विफल बनाउन कडा कदम चाल्नु पर्ने अधिकांश बक्ताहरुको धारणा रहेको थियो ।