आजदेखि मोटरसाइकल र स्कुटरमा पनि जोर बिजोर लागू हुने

१ असार, काठमाडौं । महानगरीय ट्राफिक प्रहरी महाशाखाले सोमबार आजदेखि मोटरसाइकल र स्कुटरलाई पनि जोर बिजोर लागू हुने जनाएको छ ।

महाशाखाका अनुसार दुई पाङग्रे गाडीलाई पनि जोर बिजोर अनुसार चलाउने निर्णय गरिएको छ । गएको शुक्रबार मात्रै चार पाङग्रे निजी गाडीलाई जोर बिजोर र दुई पाङग्रेमा दुई जना यात्रा गर्न नपाउने नियम बनेको थियो ।

तर आजदेखि दुई पाङ्ग्रेमा पनि जोर बिजोर लागू भएको हो । चार पाङग्रे निजी गाडी जस्तै अब मोटरसाइकल पनि जोर दिन जोर नम्बरका र बिजोर दिन बिजोर नम्बरका चल्ने छन् । प्रेस, ढुवानी लगायतका गाडीमा भने यो लागू हुने छैन ।

यस्तै, सरकारले अझै केही दिन सार्वजनिक गाडी भने चलाउन रोक लगाएको छ । कोरोना भाइरसको जोखिम बढिरहेकाले सार्वजनिक गाडी तत्काल चल्ने छैनन् ।

यसैबिच, लकडाउन खुकुलो भएसँगै काठमाण्डौ उपत्यकाका सडकमा गाडीको चाप बढेको छ । महानगरीय ट्राफिक महाशाखाका अनुसार सडक ओहोरदोहोर गर्नेलाई ट्राफिक प्रहरीले सचेतनामूलक प्ले कार्ड देखाउन थालेका छन् ।

प्ले कार्डमा कोरोनाको जोखिम बढेकाले भौतिक दूरी पालना गरेर यात्रा गर्न र ट्राफिक नियमको पालना गर्न आग्रहसहितको प्ले कार्ड काठमाण्डौका चोक चोकमा रहेका ट्राफिक प्रहरीले देखाउन थालेका छन् ।