पुराना जीवन बीमा कम्पनीहरुलाई नयाँले उछिन्न थाले, ४ कम्पनी माथि नयाँको अग्रता

८ असार, काठमाडाैं । नयाँ जीवन बीमा कम्पनीको आगमनसँगै पुराना बीमा कम्पनीलाई जीवन बीमा बजारमा आफ्नो दवदवा कायम गर्न समस्या परेको छ । प्रिमियम संकलनमा ४ पुराना जीवन बीमा कम्पनी एशियन लाईफ, प्राईम लाईफ, सूर्या लाईफ र गुराँस लाईफ इन्स्योरेन्सलाई नयाँ जीवन बीमा कम्पनी युनियन लाईफ इन्स्योरेन्सले उछिनेको छ ।

यस आर्थिक वर्षको तेश्रो त्रैमाससम्मको तथ्यांक हेर्दा युनियन लाईफले ३ अर्ब २३ करोड कुल बीमा शुल्क आर्जन गरेको छ । तर पुराना जीवन बीमा कम्पनी एशियन लाईफले भने ३ अर्ब १० करोड, प्राईम लाईफले २ अर्ब २६ करोड, सूर्या लाईफले १ अर्ब ८० करोड र गुराँस लाईफले १ अर्ब ३७ करोड मात्र कुल बीमा शुल्क आर्जन गरेका छन् ।

यसरी नयाँ जीवन बीमा कम्पनीले आक्रामक प्रिमियम संकलन गर्दा पुराना जीवन बीमा कम्पनीहरुले भने त्यो हिसाबले व्यापार गर्न नसकेको देखिन्छ। अब यस आर्थिक वर्षको अन्तिमसम्म युनियन लाईफले मेट लाईफ इन्स्योरेन्सलाई प्रिमियम संकलनमा जित्ने देखिन्छ भने नयाँ जीवन बीमा कम्पनी रिलायबल लाईफ, सिटिजन लाईफ र ज्योतिले निकै छिटो केही पुराना जीवन बीमा कम्पनीलाई उच्छिन्ने देखिन्छ ।