कोरोना पोजेटिभ युवक क्वारेन्टाइनबाट फरार

८ असार, सप्तरी । सप्तरीमा कोरोना पोजेटिभ युवक क्वारेन्टाइनबाट फरार भएका छन् । उनको पीसीआर परीक्षणको रिपोर्ट सोमबार आएको हाे ।

हनुमाननगर कंकालनी नगरपालिका वडा नम्बर १ भारदहस्थित वीपी माविको क्वारेन्टाइनमा बसेका २४ वर्षीय युवक क्वारेन्टाइनबाट भागेकाे नगरपालिकाका स्वास्थ्य शाखा संयोजक रामदेव यादवले जानकारी दिए ।

सर्लाही घर भएका ती व्यक्ति सप्तरीमै बस्दै आएका थिए । पछिल्लो समय भारतबाट आएका उनलाई क्वारेन्टाइनमा राखिएको थियो ।

दुई वटा विवाह गरेका उनको दुवै ससुराली सप्तरीमै छ । ससुरालीमा समेत उनी फेला नपरेको र प्रहरीले खोजी कार्य जारी राखेको स्वास्थ्य संयोजक यादवले बताए ।