कोरोनाले कृषि पेशामा आकर्षण बनायो 

१२ असार, स्याङ्जा । बिगत १८ वर्षदेखि काठमाडौ बस्दै आएका युवालाई काेराेना भाइरसका कारण जारी लकडाउनले गाउँ फर्की कृषि पेशामा संलग्न हुन प्रेरित गरेको छ । कोरोनाले नयाँ व्यवसाय सिकाएको छ ।

कृषि पेशामा आकर्षण बढेको छ, उम्रदै गरेको बेसार खेती देखाउदै उत्तम अर्यालले भने । उनीसहित चारजना मिलेर सदावहार अनुसन्धान तथा कृषि फर्म स्थापना गरेर कार्य समेत शुरु गरिसकेका छन् । अहिले लगाएको पाँच सय किलो बेसार उम्रने क्रममा छ भने सुन्तला ,कागती,जुनार ,मुन्तला लगाएतका दुई हजार बिरुवा लागाएका छन् ।

राष्ट्रिय फलफूल विकास केन्द्र कीर्तिपुरको अनुदान तथा सिफारिसमा गोर्खाबाट बेर्ना उपलब्ध भएको युवा व्यवसायी ज्योती रेग्मीले जानकारी दिए । कृषिलाई व्यवसायीकरण गर्दै लैजाने उनीहरुको सोच रहेको छ । बट्टाई चराबाट पनि राम्रो आम्दानी हुने भन्दै पाल्न शुरु गरिएको छ ।

बट्टाईको अण्डामा पौष्टिक तत्व बढी पाइने हुनाले माग अत्याधिक रहेको छ। अहिले पाँच सय चल्लादेखि शुरु गरेपनि दुई हजार चल्ला तत्काल थप्ने अर्का युवा व्यवसायी सुदन अर्याल बताउछन् । स्याङ्जाको पुतलीबजार नगरपालिका ११ जैसीडाँडाका स्थायी बासिन्दा उनीहरु १८ वर्षदेखि काठमाडौमा अध्ययन र व्यवसायकाे शिलशिलामा बस्दै आएका थिए । उत्तम र सुदन म्यानपावर सम्बधि व्यवसायी हुन भने ज्योती वैदेशिक रोजगारीका लागि पाँच वर्ष कोरिया बसेर आएका हुन ।

३५ वर्षे युवाहरुको कृषिमा आएको जोश देखेर स्थानीयहरु पनि हौसिएका छन । कोरोनाको कारण विश्वको अर्थतन्त्र नाजुक भैरहेको स्तिथिमा अबको उत्तम पेशा कृषि नै हो भन्ने लागेर व्यवसाय शुरु गरेको उनीहरु बताउछन । पुतलीबजार सुन्तलाको लागि उर्वर भुमी हो,त्यसैले परम्परागत नभै आधुनिक र वैज्ञानिक कृषि प्रणाली अपनाए राम्रो उत्पादन हुने  व्यवसायी पार्वती अर्याल बताउछिन् । बिस्तारै फर्ममा मौरी, कुखुरा, कालिज, बाख्रा लगायतका पशुपन्छी पाल्ने व्यवसायीले जानकारी दिए । कृषि अनुसन्धानका लागि अध्ययन गर्न आउनेहरुलाई उपयुक्त वातावरण बनाउने पनि उनीहरुको मनसाय छ।

त्यसका लागी विभिन्न प्रजातिका फलफुल तथा तरकारीवाली लगाउने पनि उनीहरु बताउछन, भन्छन यो अध्ययन अनुसन्धानका लागि नमुना फर्म बनाउने उदेश्य हो । जुन हाम्रो सोच आयो यसलाई कोरोनाले ल्याएको अबसर मान्नुपर्छ ।