यसपालीको धान दिवसमा मास्क र स्यानिटाइजर अनिवार्य

१२ असार, काठमाडौं । यस बर्षको धान रोपाई महोत्सवमा साबुन पानीले हात धोएर मात्रै खेतमा जान पाइने भएको छ । पहिले साबुनले हात धुने, स्यानिटाइजर र मास्क लगाएपछि मात्रै रोपाईमा जान दिने सरकारले तयारी गरेको छ ।

कम्तीमा २५ जना सम्मलाई हिलो खेलेर रोपाई महोत्सवमा जान दिने कृषि विभागको तयारी छ । तर त्यसका लागि स्वास्थ्य सुरक्षा सामग्री अनिवार्य गर्नुपर्नेछ ।

रोपाइँ महोत्सवमा सम्भव भएसम्म सामूहिक खाजा निरुत्साहित गर्ने, कम श्रम लाग्ने प्रविधि वा मेसिन प्रयोग गर्ने, रोपाइँपछि साबुन पानीले हात धुने वा गुणस्तरीय स्यानिटाइजर लगाउने कृषि विभागले नियम बनाएको छ ।

यसपाली मन्त्रीको रोपाई उदयपुरमा !

विगतमा जस्तै यस बर्ष पनि कृषिमन्त्री रोपाईमा सहभागि हुने कार्यक्रम छ । विगतमा रोपाई महोत्सवमा सहभागि मन्त्री बेला बेला विवादमा पर्दै आएका छन । तर पनि रोपाई महोत्सव रोकिएको भने छैन । धान रोपाई दिवसलाई भव्यतव्य गर्न लाखौँ खर्च समेत हुने गरेको छ ।

यस बर्ष तामझामका साथ रोपाई गर्न कृषि तथा पशुपन्छी विकासमन्त्री घनश्याम भुसाल उदयपुरको त्रियुगा जाने भएका छन । १७ औं राष्ट्रिय धान दिवस तथा रोपाइँ महोत्सवको औपचारिक कार्यक्रमका लागि उनी उदयपुर जाने भएका हुन ।

यसअघि यस्ता रोपाई कार्यक्रममा आवश्यकताभन्दा धेरै रमाइलो गर्दा पूर्वमन्त्री हरिप्रसाद पराजुलीको मन्त्री पद गएकै थियो । त्यसपछि मन्त्री भएका हरिबोल गजुरेल पनि विवादमा परेका थिए । गएको बर्ष कृषिमन्त्री चक्रपाणी खनालको भने कुनै विवाद निम्तिएको थिएन ।