तराईका जिल्लामा सलह किराले बाली खान थाल्यो

१३ असार, काठमाडौं । आजै मात्र देखिएको सलह किराले तराईका जिल्लामा बाली खान थालेको छ । सर्लाही, बारा र पर्सामा भेटिएको सलह किराले बाली खान थालेको स्थानीयले बताएका छन ।

अफ्रिका, युरोप, एसियामा फैलिएको सलह भारतबाट नेपाल प्रवेश गरेको हो । यो किराले अफ्रिकामा भोकमरी नै निम्त्याएको थियो ।

खासगरी नेपालमा अमेरिकी फौजी किराले समस्या निम्त्याएका बेला सलहले झन ठूलो सकस निम्त्याउने अनुमान गरिएको छ । ठूलो झुण्डमा हिड्ने यो किराले एकै रातमा धेरै किसानको बाली सखाप पार्ने क्षमता राख्दछ ।

धान, मकै, गहुँ लगायतका बाली किराको झुण्ड पसेर सखाप पार्ने यसको विशेषता हो । तराईका जिल्लामा सलह प्रवेश गरेसँगै स्थानीय त्रसित बनेका छन । उनीहरुले थाल ठटाएर किरा धपाउने प्रयास गरिरहेका छन ।

यसअघि नै यो किरा नेपाल प्रवेश गर्नेबारे बहस शुरुवात भएको थियो । तर त्यतिबेला वैज्ञानिकको एक समूहले यो किरा नेपाल आउन नसक्ने बताएका थिए । तर अहिले किरा नेपाल प्रवेश गरेपछि सरकारप्रति थप आलोचना बढ्ने संकेत देखिएको छ ।