एक किलो सलह किराको सरकारले २० रुपैयाँ दिने !

१३ असार, बुटवल । अन्ततः भारतबाट नेपाल भित्रिएको सलह किराले भोकमरी निम्त्याउने अनुमान भइरहेका बेला सरकारले अनौठो प्रस्ताव अघि सारेको छ । पदेश ५ सरकारले सलह किरा नियन्त्रण गर्न यसलाई समातेर नष्ट गर्नुपर्ने दाबी गरेको छ ।

मान्छेबाटै यसलाई समातेर नष्ट गर्नका लागि पुरस्कारको घोषणा समेत गरिएको छ । सलह नियन्त्रण गर्नका लागि एक किलो जम्मा पारेर ल्याए २० रुपैयाँ दिने प्रदेश ५ सरकारले घोषणा गरेको हो ।

‘सलह किराले पुर्‍याउन सक्ने क्षति कम गर्न विभिन्न उपायमध्ये किरा संकलन गरेर स्थानीय तहका वडा कार्यालयमा बुझाउनेलाई एक किलोग्रामको २० रुपैयाँका दरले नगद प्रोत्साहन दिने व्यवस्था गरिएको प्रदेश ५ सरकारका भूमि व्यवस्था,कृषि तथा सहकारी मन्त्रालयका सचिव तेजबहादुर वलीले बताए ।

सलह किरा दिउँसोमा उड्छ भने साँझमा बास बस्छ । बास बसेका बेलामा समातेर जम्मा गरेर क्षति रोकिनुका साथै मिहेनत वापत प्रोत्साहन रकम लिन मन्त्रालयले अपील गरेको छ । मालाथिन र क्लोरपाइरिफोस विषादी पानीमा मिसाएर छर्केर पनि सलह नष्ट गर्न सकिने मन्त्रालयले सुझाएको छ ।

यस्तै मन्त्रालयले धानको बीउलाई सुरक्षित गर्न त्रिपाल वा प्लास्टिकले ढाकेर राख्न आग्रह गरेको छ । सलह किरा हावाको वहाव जता हुन्छ, त्यतै जान्छ । शनिबार रुपन्देहीमा देखिएका सलह पाल्पा र गुल्मीतर्फ लागेका मन्त्रालयले जनाएको छ । सलह किराको ठूलो झुण्डले बास बसेको ठाउँमा एक रातमा ३५ हजार मानिसको खाना बराबर बालीनाली नोक्सान गर्ने गरेको छ ।

यदि रफ्तारमा यसले क्षति पुर्याउन थाले नेपालमा ठूलो भोकमरी सिर्जना हुने सरकारी अधिकारी र कृषिविज्ञको अनुमान छ ।