गुल्मीमा थप ३७ जनामा काेराेना संक्रमण, संक्रमितको संख्या ३२४ पुग्यो

१६ असार, गुल्मी । गुल्मीमा कोरोना संक्रमितको संख्या ३ सय नाघेको छ । आज थप ३७ जनामा संक्रमण पुष्टि भएसँगै संक्रमितको संख्या ३ सय २४ पुगेको हो ।

प्रादेशिक प्रयोगशाला रुपन्देहीमा गरिएको परीक्षणमा जिल्लाको गुल्मीदरवार गाउँपालिकामा २१ जना, रुरुक्षेत्र गाउँपालिकामा ८ जना र छत्रकोट गाउँपालिकामा ८ गरी ३७ जनामा कोरोना संक्रमण पुष्टि भएको छ  । संक्रमित सबै भारतबाट आएर क्वारेन्टाइनमा बसेकाहरु हुन् ।

नयाँ ३७ जना संक्रमित थपिएसँगै गुल्मी जिल्लामा कोरोना पुष्टि भएकाहरुको संख्या ३२४ पुगेको छ । ४२ जना कोरोना मुक्त भएर घर फर्केका छन् । जिल्लामा कोरोनाबाट ३ जनाको मृत्यु भइसकेको छ । जिल्लाबाट १ हजार ५ सय २२ जनाको स्वाब संकलन गरेर पठाइएकोमा ३८५ जनाको रिपोर्ट आउन बाँकी रहेको छ ।