जसलाई आईजीपी बनाउँदा पनि खुशी हुने नै हुन त ?

१७ असार, काठमाडौं । नेपाल प्रहरीले एक हप्तापछि नयाँ आईजीपी पाउँदैछ । वर्तमान आईजीपी ठाकुरप्रसाद ज्ञवाली ३० बर्षे सेवा हदका कारण सेवानिवृत्त हुदैछन् । बिगतमा आईजीपी बन्ने बेला प्रहरी संगठनमा ठूलो उछाल आउने गरेपनि यसपटक सुनसान छ ।

बिगतमा एकले अर्काकाे बदनामी गर्ने, उसका कमजोरी र विगतका गल्तीलाई उछाल्ने, संगठनको छविभन्दा आफ्नै स्वार्थ माथि राख्ने प्रहरी अधिकारीको प्रवृत्ति हुन्थ्यो । तर अहिले आईजीपीका दाबेदार एआईजी शैलेश थापा क्षेत्री र हरिबहादुर पाल दुबैजना सौहार्द ढंगबाट सार्वजनिक कार्यक्रममा देखिन थालेका छन् ।

बुधबार ललितपुर प्रहरीको ब्यारेक उद्घाटन कार्यक्रममा सकारात्मक सन्देश दिने गरी दुबै एआईजी सँगसँगै देखिए । सँगै गाडीमा गए । सँगै गाडीबाट झरेर एउटै सोफामा बसे । जुन दृश्य हेरिरहेका अरु प्रहरी अधिकृत पनि अचम्म मानिरहेका थिए । सँगै खुशी पनि ।

बर्षौपछि नेपाल प्रहरीमा यस्तो वातावरण देखिएको हो । आईजीपी बन्नु एक हप्ताअघिदेखि नै यस्तो वातावरण बनाउनु सुखद मात्रै होइन, विरलै र साहसी काम हो । कार्यक्रम भरी मुसुक्क मुस्कुराएर बसेका दुबै जनाको सबैले प्रशंसा गरिरहेका छन ।

कार्यक्रमपछि पनि उनीहरु बाहिरिदै गर्दा पत्रकारलाई प्रतिक्रिया दिन भ्याए । दुबै जनाको एउटै जवाफ थियो- “जो बनेपनि एक जना आईजीपी बन्ने हो । मिलेर संगठन चलाउने हो । एक अर्कालाई सम्मान गरेर साथ सहयोग लिएर अगाडी बढ्ने हो । हामी दुबै जना राम्रा साथी हौँ । रिटायर्ड भएपछि पनि साथी बन्ने हो ।’

विगतमा आईजीपी बन्दा रमेश खरेल, पुष्कर कार्की र सर्वेन्द्र खनालबीच निकै रस्साकस्सी चलेको थियो । सरकारले खनाललाई आईजीपी बनाएपछि रमेश खरेलले राजीनामा दिए भने कार्कीले उनलाई खुलेर सहयोग गरेनन् ।

त्यसअघि डीआइजी नवराज सिलवाल, जयबहादुर चन्द, प्रकाश अर्यालबीच पनि उस्तै विवाद रह्यो । सरकारले शुरुमा जयबहादुर चन्दलाई आईजीपी बनायो । तर सिलवालले सर्वोच्चमा मुद्दा हाले । पछि सरकारले विवाद बढेपछि प्रकाश अर्याललाई आईजीपी बनायो । सिलवालले राजीनामा दिए भने चन्द मुर्मुरिएर बसे ।

त्यसअघि सरकारले उपेन्द्रकान्त अर्याललाई आईजीपी बनायो । तर राजेन्द्र भण्डारी मुर्मुरिएर बसे । यी तीन घटनाले नेपाली प्रहरीलाई हदैसम्म विवादित बनाएको थियो । तर अहिले एआईजी थापा र पालको सौहार्दपूर्ण व्यवहारले नेपाल प्रहरी संगठनको छवि इतिहासमै उचो बन्ने प्रहरी अधिकारीको विश्वास छ ।