बनैनियाबाट लागुऔषधसहित दुई पक्राउ

◊ धीरुभाइ

१९ असार, सप्तरी । लागुऔषध ओसारपसार गरिरहेको आरोपमा प्रहरीले दुई युवालाई पक्राउ गरेको छ । राजगढ गाउँपालिका–२ बनैनियाबाट छिन्नमस्ता गाउँपालिका–४ लालापट्टीका २१ वर्षीय कृष्ण यादब र बोदे बर्साइन नगरपालिका–३ का २२ वर्षीय सुनिलकुमार यादव पक्राउ परेको जिल्ला प्रहरी कार्यालयले जनाएको छ ।

जिल्लाको राजगढ गाउँपालिका २ बनैनिया स्थित भारतबाट नेपालतर्फ प्रदेश २–००१–००१ प. ५३९४ नम्बरको पल्सर मोटरसाइकलमा सवार भई आउँदै गरेको अवस्थामा लागुऔषधसहित उनीहरुलाई पक्राउ गरिएकाे जिल्ला प्रहरी कार्यालयका प्रहरी नायब उपरीक्षक तिलक भारतीले बताए ।

सशस्त्र प्रहरी बेस क्याम्प बनैनियाबाट खटिएको सशस्त्र प्रहरी टोलीले राजगढ गाउँपालिका २ बनैनिया स्थित भारतबाट नेपालतर्फ प्रदेश २–००१–००१ प. ५३९४ नम्बरको पल्सर मोटरसाइकलमा सवार भई आउँदै गरेको अवस्थामा लागुऔषध नियन्त्रणमा लिई आवश्यक कारवाहीका लागि प्रहरी चौकी झुटकीको जिम्मा लगाएको छ ।

उनीहरुको साथबाट २२५ ट्याब्लेट नाइट्रजेपाम र एक सय मिलीलिटरको २० बोतल डाइलेक्स डीसी बरामद गरिएको छ ।  सशस्त्र प्रहरी वेश क्याम्प बनैनियाबाट खटिएको सशस्त्र प्रहरी टोलीले बिहीबार साँझ उनीहरुलाई नियन्त्रणमा लिएकाे हाे ।