पाण्डेयको हत्या भएको खुलासा, दुईजना जेल चलान

२० असार, स्याङ्जा । एक महिना अगाडी भीरबाट लडेर मृत्यु भएका भनिएका व्यक्तिको हत्या भएको खुलासा भएको छ । पिकनिक खाएर फर्कदै गर्दा भीरबाट लडेर मृत्यु भएको भनिएका गल्याङ् नगरपालिका ४ का ३२ बर्षिय पदमप्रसाद पाण्डेयको हत्या भएको खुलेको हो ।

घट्ना लगत्तै वडा प्रहरी कार्यालय वालिङका प्रमुख प्रहरी निरीक्षक निरन्जन घिमिरेको नेतृत्वमा घट्नास्थल र संलग्नको अनुसन्धान थालेपछि दुईजनामा हत्याको आरोप लागेको थियो । प्रहरी निरिक्षक घिमिरेको लामो अनुसन्धानपछि हत्याको आरोप लागेका दुईजनालाई जिल्ला अदालत स्याङ्जाले पूर्पक्षका लागि जेल चलान गरेको छ । पाण्डेयको हत्याको आरोप लागका स्थानीय चन्द्रकान्त न्यौपाने र नाउदेउ न्यौपाने पूर्पक्षका लागि जेलचलान भएको जिल्ला प्रहरी कार्यालय स्याङ्जाका प्रवक्ता राजेन्द्र अधिकारीले जानकारी दिए ।

गत जेठ २१ गते साथीहरुसँगै मिलेर खसी काटेर खाने गरी पिकनिक गएका पाण्डेय जेठ २२ गते मृत अवस्थामा फेला परेका थिए । पिकनिकमा संलग्नहरुलाई पक्राउ गरी अनुसन्धान थालिएको थियो । अनुसन्धानबाट हत्यामा दुईजनाको संलग्नता रहेको प्रहरीको अनुसन्धानपछि न्यौपानेद्धयलाई जिल्ला अदालतले जेल चलान गरेको हो ।

पिकनिकमा मादकपदार्थ सेवन र पाण्डेसँग न्यौपानेको लेनदेन रहेकाले झगडा शुरु भएपछि हात हालाहालको सिर्जना हुँदा उनी घाइते भएको प्रहरी अनुसन्धानबाट खुलेको छ । घाईते भएका पाण्डे मृत अवस्थामा फेला परेका थिए । मृतक पाण्डेकी श्रीमतीले घटना रहस्यमय रहेको र हत्या नै भएको भन्दै किटानी जाहेरी समेत दिएकी थिईन ।

गल्याङ सेतीबेणी ग्रामिण कच्ची सडक अन्तरगत पर्ने गल्याङ नगरपालिका वडा नम्वर ५ सपौदेको भीरमा पाण्डेको शव मृत अवस्थामा फेला परेको थियो ।