बाढीले बितण्डा मच्चाएको बाह्रबिसे (फोटोफिचर)

२४ असार, काठमाडौं । अचानक परेको बर्षापछि सिन्धुपाल्चोकको बाह्रबिसेमा आएको बाढीले बितण्डा मच्चाएको छ । बाढीले १५ भन्दा बढी घर बगाएको छ भने २० जना जति बेपत्ता छन । अहिलेसम्म दुई जनाको शव भेटिएको छ भने अरुको खोजी भइरहेको छ ।

हराईरहेकाहरुको खोजीका लागि सेनाको हेलिकोप्टर परिचालन गरिएको छ । बाढीले बितण्डा मच्चाएको बाह्रेबिसे यतिबेला शोकमा डुबेको छ । जम्बुको बजार नै बगाएपछि सिन्धुपाल्चोकबासी शोकमा डुबेका हुन् ।

अहिलेसम्म को को हराए ? भनेर सनाखत भइसकेको छैन । तर राती आएको बाढीले अचानक घर नै बगाएर लगेपछि धेरै जना हराउन पुगेकाे प्रहरीको भनाई छ । बाढीले मच्चाएको बितण्डाको प्रत्यक्ष अवलोकन गर्न सभामुख अग्नि सापकोटा बाह्रबिसे पुगेका छन् । उनी सिन्धुपाल्चोकका जनप्रतिनिधि हुन ।

नेपाली सेनाको हेलिकोप्टर लिएर उनी बाह्रबिसे पुगेका हुन् । घटनाको प्रत्यक्ष अवालेकन गर्न गएका सभामुखका प्रेस सल्लाहकार श्रीधर न्यौपानेले पठाएका तस्बिर हेर्दा बाढीले धेरैको जीउ ज्यान मात्रै लिएको छैन, बर्षौदेखिको मिहिनेतले ठडयाइएका सपनाका घरहरु पनि गल्र्याम गुर्लुम ढालेको छ ।

सबै फोटो : सभामुख सापकोटाका प्रेस सल्लाहकार श्रीधर न्यौपानेको फेसबुकबाट