अवैध मृगौला प्रत्यारोपणमा संलग्न वडाध्यक्ष र डाक्टरसहित १२ जना पक्राउ

काठमाडौं । मेडिकल कलेजभित्र अवैध रूपमा मृगौला प्रत्यारोपणमा सलंग्न रहेको आरोपमा डाक्टर र जनप्रतिनिधिसहित १२ जना पक्राउ परेका छन । प्रहरीको मानव बेचबिखन अनुसन्धान ब्युरोले पक्राउ परेकालाई आइतबार पत्रकार सम्मेलन गरी १२ जनालाई सार्वजनिक गरेको हो ।

प्रहरीले आइतबार ९ जना र शनिबार चितवनबाट ३ जना डाक्टरसहित १२ जनालाई पक्राउ गरेर सार्वजनिक गरेको हो । पक्राउ परेका १२ जनाविरूद्ध जिल्ला अदालत ललितपुरबाट पक्राउ पूर्जी जारी भएको थियो।

पक्राउ पर्नेमा २ जना महिला र एक वडा अध्यक्ष हुन् । पक्राउ परेका वडाध्यक्ष ललितपुर महानगर वडा नम्बर ३ का अध्यक्ष श्रीगोपाल महर्जन हुन । चितवन मेडिकल कलेजमा भएको अवैध प्रत्यारोपणका विषयमा वडाध्यक्षको सलंग्नता देखिएको हो ।

वडाध्यक्षले डाक्टरहरुलाई सघाएको आरोप लगाइएको छ । नक्कली नाता प्रमाणित गर्ने कागजमा हस्ताक्षर गरेको पाइएपछि प्रहरीले वडाध्यक्षलाई पनि पक्राउ गरी सार्वजनिक गरेको हो । यसअघि प्रहरीले ललितपुरको निदान अस्पतालबाट अवैध मृगौला प्रत्यारोपणमा सलंग्न डाक्टरलाई पक्राउ गरेर सार्वजनिक गरेको थियो ।