अबैध क्रसरले बीपी राजमार्ग जोखिममा

नेपालथोक ( काभ्रे ) । पूर्वी तराईसँग छोटो दूरीमा राजधानी जोड्ने बीपी राजमार्ग अहिले अबैध क्रसर उद्योगको चरम दोहनको शिकार भएको छ । वर्षा लागेसँगै यो राजमार्गबाट गरिने यात्रा जोखिमयुक्त हुने गरेको छ ।

अबैध रुपमा स्थापना गरिएका क्रसरले गर्दा वर्षाको सबै भल राजमार्गमा आउने गरेको छ । यसले बाटो नै अवरुद्ध हुने गरेको छ । यो समस्याले गर्दा स्थानीयबासी समेत आजित भएका छन् । अहिले बीपी राजमार्ग अन्तर्गतको काभ्रेपलाञ्चोक जिल्ला रोशी गाउँपालिका वडा नं. ११ मा पर्ने माम्ती खोलामा आउने लेदोका कारण बेलाबेला राजमार्ग नै अवरुद्ध हुने गरेको छ ।

खहरे खोला भएपनि वर्षायाममा भने नजिकैको अवैध क्रसरले थुपारेको ढुँगा र गिट्टीको थुुप्रो नै सोहरेर बगाउने गर्दा राजमार्ग पूरै अबरुद्ध हुने गरेको हो । बाटोमा हिंडिरहेको सवारी साधन वा मानिस कतिबेला भलको शिकार हुने हो भन्ने अत्तोपत्तो छैन । बेला बेलामा राजमार्गमा थुप्रिने गरेको लेदो सफा गर्न डोजर नै चलाउनु परेको स्थानीयको गुनासो छ ।

खोलाको छेवैमा राजभक्त श्रेष्ठ भन्ने व्यापारीले अवैध रुपमा क्रसर उद्योग सञ्चालन गरेकोले समस्या भइरहेको स्थानीयको भनाई छ । यसबारे स्थानीयले पटक पटक वडाध्यक्षलगायत गाउँपालिकामा समेत उजुुरी गरेको भएपनि सुनुवाई भएको छैन । साथै, जिल्ला प्रशासन कार्यालयमा समेत यसबारे पटक पटक गुनासो गरिएको छ, तर कसैले सुनेका छैनन् – स्थानीय कुमार लामा बताउँछन् ।

उक्त क्रसर उद्योगमा स्थानीय निकायका पदाधिकारीको नै शेयर रहेको धरैको आरोप छ । रोशी गाउँपालिका वडा न. ११ का वडाध्यक्ष मिलन मिलन लामा, वडा न. १२ का वडाध्यक्ष फुर्सद मोक्तान र जिल्ला प्रशासन कार्यालयको एक जना कर्मचारीको पनि सो क्रसरमा मुख्य शेयर रहेको बताइएको छ । अब कि त क्रसर उद्योग बन्द गर्नुप¥यो वा पक्की पुल बनाउनुप¥यो भन्दै उनले नत्र कुनैपनि बेला ठूलै मानवीय क्षति पुग्न सक्ने चेतावनी दिए ।