पोखरामा मास्क नलगाई हिँड्ने १०२ जना पक्राउ

पोखरा । पोखरामा मास्क नलगाई सार्वजनिक ठाउँमा हिँड्ने १ सय २ जना पक्राउ परेका छन् । उनीहरुलाई प्रतिव्यक्ति सय रुपैयाँ जरिवाना तिराई कारबाही गरिएको हो ।

कारबाहीमा पर्नेमा ८८ जना पुरुष र १४ जना महिला छन् । संक्रामक रोग ऐन अन्तर्गत खासमा सय रुपैयाँ जरिवाना र एक महिना कैद हो ।

जारी लकडाउन खुकुलो बनाए पनि कोरोना भाइरस ‘कोभिड १९’ फैलिन नदिन सरकारले अनिवार्य मास्क लगाउन निर्देशन जारी गरेको छ । उक्त निर्देशनविपरीत अटेरी गर्नेलाई कारबाही गर्नुपरेको हाे ।

नेपाल सरकारले मंगलबारबाट अनिवार्य रुपमा मास्क र न्यूनतम २ मिटरको दूरी कायम गरी लकडाउन पालना गराउन र त्यसो नगरेको पाइएमा कारबाही गर्न निर्देशन दिएको थियो ।