कोरोना परीक्षण भन्दै अवैध शुल्क असुल्ने निजी अस्पतालमाथि छानबिन शुरु

काठमाडौं । सरकारले कोरोना परीक्षणका नाममा अवैध शुल्क असुल्ने निजी अस्पतालमाथि छानबिन शुरु गरेको छ । काठमाडौं उपत्यकाका ग्राण्डी, ह्याम्स अस्पताल र जोरपाटीको अत्तरखेलस्थित नेपाल मेडिकल कलेजले अवैध रुपमा कोरोना परीक्षण भन्दै शुल्क उठाउन थालेपछि सरकारले छानबिन शुरु गरेको हो ।

स्वास्थ्य तथा जनसंख्या मन्त्रालयले निजी अस्पतालको ज्यादतीबारे छानबिन गर्न समिति गठन गरेको छ । गुणस्तर मापन तथा अनुगमन महाशाखाले मन्त्रालयका वरिष्ठ औषधि व्यवस्थापक पानबहादुर क्षेत्रीको संयोजकत्वमा ३ सदस्यीय छानबिन समिति गठन गरेर अनुसन्धान थालेको हो । समितिमा राष्ट्रिय जनस्वास्थ्य प्रयोगशालाका प्याथोलोजिस्ट डा शंकर काफ्ले र स्वास्थ्य मन्त्रालयका जनस्वास्थ्य अधिकृत रवीकान्त मिश्र सदस्य छन्।

मन्त्रालयले यी तीन अस्पतालले सरकारी निर्देशिका विपरीत स्वाब संकलन गरी परीक्षणका लागि सरकारी प्रयोगशालामा पठाउने र सेवाग्राहीसँग मनपरी शुल्क उठाएको गुनासो आएपछि छानबिन गर्न लागेको जनाएको छ । भोलिसम्म छानबिन प्रतिवेदन बुझाउन समितिलाई निर्देशन दिइएको छ ।

स्वास्थ्य मन्त्रालयले केही दिनअघि वीर, पाटन र शिक्षण अस्पताललाई शुल्क लिएर परीक्षण गर्न अनुमति दिएको थियो। आइतबारमात्रै सानेपास्थित स्टार अस्पता र सिनामंगलस्थित काठमाडाैं मेडिकल कलेजले आफैं स्वाब संकलन गरेर परीक्षण गर्ने अनुमति पाएका थिए। तर अनुमति नपाएको अस्पतालले ५ हजारदेखि १० हजार रुपैयाँसम्म उठाएको आरोप छ ।