बर्षामा पनि सलह नेपाल आउँदै, धान र मकैमा क्षति गर्ने सम्भावना

काठमाडौं । भारतको उत्तर प्रदेश र विहारमा रहेको सलह कीराको झुण्ड नेपाल आउने सम्भावना बढेको छ । यसअघि प्रतिकुल मौसमका कारण नेपाल आउन नसक्ने भनिएको सलह फेरि नेपाल आउने सम्भावना बढेको विज्ञहरुले बताएका छन ।

कृषि तथा पशुपंक्षी विकास मन्त्रालयको प्लान्ट क्वारेन्टाइन तथा विषादी व्यवस्थापन केन्द्रले भारतबाट नेपाल आउन सक्ने सम्भावना बढेको बताएको हो । केन्द्रका प्रमुख सहदेव हुमागाईंले सिमावर्ती क्षेत्रका विभिन्न ठाउँमा फैलिएका झुण्ड ठूलो संख्यामा रहेको र त्यसको केही झुण्ड नेपाल आउन सक्ने सम्भावना बढेको बताएका हुन ।

हावाको गतिसँगै सलह फेरि नेपाल आउने सम्भावना बढेको उनले दाबी गरे । सलहको झुण्ड तराईका सर्लाही, धनुषा लगायतका जिल्लाबाट भित्रिने पनि उनको भनाई छ । यसअघि नेपाल आएको झुण्ड भने मध्य पहाडका केही जिल्लामा सक्रिय छ ।

तर प्रतिकुल मौसमका कारण सलहले नेपालमा ठूलो क्षति पार्न नसकेको विज्ञहरुको दाबी छ । केही ठाउँमा सक्रिय रहेको झुण्ड पनि हावा र बर्षाका कारण तितरवितर भएको हुमागाईले दाबी गरे । भारतमा अनुकुल मौसमका कारण झुण्डमै रहेको सलहले नेपालमा सोचेजस्तो ठूलो नोक्सानी नपार्ने उनको भनाई छ ।

यसअघि आएको सलहले प्युठान, बाँके, दाङ लगायतका जिल्लामा किसानको बालीमा क्षति पु¥याएको थियो । नेपाल कृषि अनुसन्धान परिषद नार्कका कीट वैज्ञानिक सुदीपकुमार उपाध्यायले मौसम अनुकुल नभएकाले नेपालमा सलहले ठूलो क्षति पार्न नसकेको बताएका हुन ।