आजै थपिए एक सय ६७ जना संक्रमित

१ साउन, काठमाडौं । कोरोना भाइरसका एक सय ६७ जना संक्रमित बिहीबार थपिएका छन्। स्वास्थ्य तथा जनसंख्या मन्त्रालयका प्रवक्ता डाक्टर जागेश्वर गौतमले दिएको जानकारीअनुसार देशभरका २७ वटा प्रयोगशालामा चार हजार ९ सय ४१ जनामा गरिएको पीसीआर परीक्षणका क्रममा एक सय ६७ जना संक्रमित थपिएका हुन्।

अब कोरोना संक्रमितको संख्या १७ हजार तीन सय ४४ पुगेको छ। कोरोना निको भएर बिहीबार दुई सय १३ जना घर फर्किएका छन्। अहिलेसम्म कोरोना निको हुनेको संख्या ११ हजार दुई सय ५९ पुगेको छ।

आइसोलेसनमा छ हजार ५६ जना छन् भने क्वारेन्टाइन २३ हजार पाँच सय मानिस रहेको उनले जानकारी दिए। गौतमले नेपालमा दैनिक रूपमा १० हजार पीसीआर परीक्षण गर्न सक्ने क्षमता रहेको जानकारी दिए।

उनले संक्रमितको संख्या कम भए पनि जोखिम भने नघटेको उल्लेख गरे। अहिलेसम्म कोरोनाबाट नेपालमा ३९ जनाको मृत्यु भएको छ।