कर्णालीका सबै जिल्लामा पुग्यो सलह

२ साउन, सुर्खेत । भारतबाट भित्रिएको ठूलो झुण्डको सलह कर्णालीका सबै जिल्लामा देखिएको छ । शुक्रबार दिउँसो प्रदेश राजधानी वीरेन्द्रनगरमा ठूलो संख्यामा देखिएको हो ।

बिहीबार पूर्वी सुर्खेत र सल्यानका केही स्थानमा देखिएको सलह किराको समूह शुक्रबार वीरेन्द्रनगर पुगेको हो । वीरेन्द्रनगरको सुब्बाकुना हुँदै देखिएको सलह पिपिरा, नेवारे, इत्राम हुँदै उपत्यकाका विभिन्न ठाउँमा पसेको छ । ठूलो संख्यामा सलह पसेपछि कृषकहरु थाल बजाउँदै, आगो बाल्दै धपाउन थालेका छन ।

कर्णालीका लगभग सबै जिल्लामा सलह पुगेको छ । मुगुमा आधिकारिक रुपमा सलह पुगेको जानकारी नआएपनि सबै जिल्लामा सलह पुगिसकेको पाइएको छ । भारतबाट भित्रिएको सलह दाङ र बाँके हुदै कर्णाली प्रदेश भित्रिएको हो ।

यसै पनि गरीबीले पिल्सिएको कर्णालीमा सलहले भोकमरी निम्त्याउने चिन्ता थपिएको छ ।