सलहको अर्को ठूलो झुण्ड नेपाल आउदै, बाली सखाप पार्ने विज्ञको चेतावनी

४ असार, काठमाण्डौ । पछिल्लो समय भारतबाट नेपाल आइरहेको सलहले ठूलो नोक्सानी पार्ने सक्ने चेतावनी विज्ञले दिएका छन । भारतबाट एकपछि अर्को गरी सलहको झुण्ड नेपाल आइरहेकाले किसानको बाली नाली सखाप पार्न सक्ने चिन्ता विज्ञले व्यक्त गरेका हुन् ।

नेपालको सीमा नजिक करोडौको संख्यामा सलह रहेकाले त्यो झुण्ड नेपाल आउन सक्ने चिन्ता विज्ञहरुलाई छ । कृषि तथा पशुपंक्षी विकास मन्त्रालय अन्तर्गतको क्वारेन्टाइन तथा विषादी ब्यवस्थापन केन्द्रले भारतीय सीमावर्ती क्षेत्रमा रहेको करोडौ संख्याको सलहले नेपाल प्रवेश गरेमा त्यसले अहिले लगाएको मकै र धानबाली खान सक्ने जनाएको छ ।

केन्द्रका उपसचिव रामकृष्ण सुवेदीले नेपाल आउने झुण्डले सोझै बालीनाली खाने भएकाले आउनेवित्तिकै धपाउन आग्रह गरे । भारतबाट हावाको वहाव नेपालतिर सरेकाले त्यही वहावसँगै सलहको ठूलो झुण्ड नेपाल आउने सुवेदीको भनाई छ ।

खासगरी तराईका जिल्लामा सलहको ठूलो झुण्ड प्रवेश गरेमा त्यसले नोक्सानी गर्ने पनि सुवेदीको भनाई छ । पश्चिमका जिल्लाबाट यसअघि भित्रिएको सलहले कर्णाली प्रदेशमा बाली सखाप पार्ने चिन्ता विज्ञहरुको छ ।

नेपाल कृषि अनुसन्धान परिषद नार्कका कीट वैज्ञानिक सुदीप उपाध्यायले एक दुई दिनमा नेपाल आईपुग्ने सलहबाट ठूलो जोखिम रहेको बताए ।

भर्खर धान रोपेको र मकै पनि बढेकाले मकैको पात तथा रोपेको धान खाईदिन सक्ने उनले बताए । सलह आउनेवित्तिकै थाल ठटाएर भगाउन र आफ्नो खेतबारीको हेरविचार गर्न वैज्ञानिक उपाध्यायले आग्रह गरेका छन ।