बारेकोट पहिरोमा विस्थापित सार्की समुदायको बिचल्ली

४ साउन, जाजरकोट । बारेकोट गाउँपालिका ४ जिरी सार्कीगाउँमा पहिरोका कारण विस्थापित भएका सार्की समुदायको बिचल्ली भएको छ । असार २५ गते राती घरमाथिबाट गएको पहिरोका कारण सार्कीगाउँमा दुई घर पुरिदा १२ जनाको मृत्यु भएको थियो ।

पहिरोमा पुरिएकामध्ये ११ जनाको शब भेटिएपनि १ जना भने अझै बेपत्ता छन । ११ जनाको गएको हप्ता सामुहिक अन्त्येष्टि गरिएको थियो । तर पहिरोबाट विस्थापित भएका सार्कीगाउँका ३३ घर परिवारका तीन सय बढीको बिचल्ली भएको हो ।

खासै पर्याप्त खेतबारी नहुदाँ अन्नबाली नहुने उनीहरु मजदुरीकै भरमा गुजारा गर्ने गरेका थिए । तर पहिरोले दुई घरका १२ जनाको एकै चिहान बनाएपछि बाँकी रहेका छिमेकी त्यहाँबाट विस्थापित भएका हुन ।

अहिले त्यहाँकै भगवती आधारभूत विद्यालयको चौरमा पाल टागेर बसेका उनीहरुलाई खान, लाउन, बस्न समस्या छ । स्थानीय राजनीतिक दलका नेता तथा कार्यकर्ताले राहत दिने आश्वासन दिएपनि आफ्नो पुनस्र्थापनाबारे कुनै पहल नगरेको उनीहरुको गुनासो छ ।

लोकेन्द्र विश्वकर्माबाट