रञ्जनको सजाय घटाउने फैसलाविरुद्ध सर्वोच्चमा पुनरावलोकन मुद्दा !

८ साउन, काठमाडौं । श्रीमतीको हत्या गरेर जलाउन लागेको अवस्थामा पक्राउ परी जेल बसेर पनि रिहा भएका पूर्वडीआईजी रञ्जन कोइरालाविरुद्ध सर्वोच्च अदालतमा पुनरावलोकन मुद्दा दर्ता भएको छ ।

८ वर्ष जेल बसेर बिहीबार रिहा भएका पूर्वडीआईजी कोइरालाको सजाय छुट दिने सर्वोच्च अदालतको फैसला पुनरावलोकनको माग गर्दै सर्वोच्चमै बिहीबार निवेदन दर्ता भएको हो । महान्यायाधिवक्ताको कार्यालयले फैसला पुनरावलोकनका लागि निवेदन दिएको हो । सरकारी वकिलले बिहीबार फैसला पुनरावलोकनको निवेदन दर्ता गराएका हुन् ।

प्रधानन्यायाधीश चाेलेन्द्रशमसेर जबरा र न्यायाधीश तेजबहादुर केसीको संयुक्त इजलासले पूर्वडीआईजी कोइरालालाई यसअघिको सर्वस्वसहित जन्मकैदको फैसला उल्ट्याई आठ वर्ष ६ महिना सजाय कायम गरेको थियो । सोही फैसलाका आधारमा कोइराला बिहीबार छुटेका हुन् ।

यसअघिको फैसलाअनुसार उनी अझै ११ बर्ष जेल बस्नुपर्ने थियो । तर सर्वोच्चको आदेशपछि ८ बर्ष सजाय पुरा गरी रञ्जन छुटेका हुन् । सर्वोच्च अदालतको फैसला चित्त नबुझे दुईवटा आधारमा पुनरावलोकनको निवेदन दिन सकिने कानुनी व्यवस्था छ । यससँगै फैसला गर्ने न्यायाधीशको पनि सामाजिक सञ्जालमा आलोचना भएको छ ।