भुवन र साम्राज्ञीको विवाद अदालतमा पुग्यो, अब वारपारकै लडाई !

९ साउन, काठमाडौं । नेपाल चलचित्रमा पछिल्लो केही महिनादेखि बल्झिएको नायक भूवन केसी र नायिका साम्राज्ञी राज्यलक्ष्मी शाहबीचको विवाद अदालतमा प्रवेश गरेको छ । शुक्रबार भुवनले साम्राज्ञीविरुद्ध जिल्ला अदालत काठमाडाैंमा मुद्दा दर्ता गरेका छन् ।

साम्राज्ञीले हुँदै नभएको कुरा उचालेर आफ्नो मानहानी गरेको आरोप भुवनले लगाएका छन् । तर साम्राज्ञीले भने पहिलो चलचित्र ड्रिम्समा आफूमाथि भुवनले यौन दुव्र्यवहार गरेको आरोप लगाएकी छिन् । लकडाउन भएयता सामाजिक सञ्जाल फेसबुक, ट्वीटर र इन्स्टाग्राममा भुवन र साम्राज्ञीबीच आरोप प्रत्यारोप चल्दै आएको छ ।

सामाजिक सञ्जालमा लाइभमै आएर साम्राज्ञीले भुवनविरुद्ध मुख खोलेकी थिइन् । पछि भुवनले यसको उपचार खोज्ने भन्दै चलचित्र निर्माता संघमा उजुरी दर्ता गराएका थिए । तर त्यहाँ पनि विवाद समाधान भएन् । अहिले अदालतमा मुद्दा दर्ता भएको र अदालतले नै सही गलत छुट्याएर फैसला दिने भुवनको भनाई छ ।

यसले अब भुवन र साम्राज्ञीबीचको विवाद नयाँ चरणमा प्रवेश गरेको छ । यसअघि यस्ता विवाद प्रहरीमा पुग्ने गरेका थिए । तर गसीपकै बीचमा उत्कर्षमा पुगेको विवाद अब झन् चर्चा र साच्चिकै वारपारको अवस्थामा पुगेको हाे ।