प्रहरी जवानकै कोठाबाट सुन जस्तो देखिने धातु बरामद

१६ साउन, काठमाडौं । प्रहरीको कोठाबाट एक किलो धातु बरामद भएको छ । साढे १४ किलो चाँदी र आधा किलो सुन प्रकरणको अनुसन्धानका क्रममा थप एक किलो धातु प्रहरीकै कोठाबाट बरामद भएको हो ।

सादा पोशाकका प्रहरी जवान प्रसन्न श्रेष्ठको कोठाबाट एक किलो सुन जस्तो धातु बरामद भएको प्रहरीले जनाएको छ । महानगरीय प्रहरी वृत्त दरबारमार्गका तत्कालीन डीएसपी रञ्जन दाहाललाई गलत सूचना दिएको अभियोग लागेका सादा पोशाकका प्रहरी जवान श्रेष्ठको कोठामा छापा हान्दा सुन जस्तो देखिएको धातु बरामद भएको हो ।

प्रहरीले मंगलबार कमलादीबाट १५ किलो सुन जस्तो देखिने पहेँलो धातु बरामद गरेको भन्यो । तर, परीक्षणका क्रममा साढे १४ किलो धातु चाँदी भएको पुष्टि भएको थियो । आधा किलो सुन पनि बरामद भएको भनिएको थियो । यसमा दरबारमार्गका वृत्त प्रमुख डीएसपी दाहाललाई प्रहरी जवान बहादुरसिंह कडायत र प्रसन्न श्रेष्ठले गुमराहमा राखेको पनि अनुसन्धानबाट भेटिएको छ ।

एसएसपी शुशीलकुमार यादव नेतृत्वको छानविन समितिले गरेको अनुसन्धानमा शुरुमा डीएसपी दाहालले तथा पछि जवानद्धय कडायत र श्रेष्ठले माथिल्लो निकायलाई गुमराहमा राखेको आरोप छ । यस विषयमा थप अन्सन्धान भइरहेको प्रहरीले जनाएको छ ।