ब्रिटिश आर्मीमा भर्ती खुल्यो, गत वर्ष अन्तिम चरणमा पुगेर बाहिरिनेलाई मात्र अवसर

२२ साउन, काठमाडौँ । खुशिको खबर  ! ब्रिटिस आर्मी मुख्यालयले ब्रिटिस र सिंगापुर ‘रिक्रुट इन्टेक २०२१’ भर्ती खुलाएको छ । कोरोनाले गर्दा गएको वर्षको इन्टेकमा अन्तिम छनोटबाट बाहिरिएकालाई मात्र यो अवसर दिएको छ । ब्रिटेनको ब्रिगेड अफ् गोर्खाजका निम्ति ४ सय ३२ जना र सिंगापुर पुलिस फोर्समा १ सय २० जनाको छनोट गरिने ब्रिटिस आर्मी मुख्यालयले वेबसाइट आर्मी डट एमओडी डट युकेमा उल्लेख छ ।

ब्रिटिस आर्मी मुख्यालयका कर्णेल महासेनानी तथा ब्रिटिस गोर्खा नेपालका कमाण्डर रिचार्ड गुडम्यानले यसअघि कोभिड–१९ महामारीको कारण प्रत्यक्ष रूपमा यस वर्षको ‘रिक्रुटिङ’ मा फेरबदल गरिएको जनाएका थिए । ‘रजिस्ट्रेसन र क्षेत्रीय छनौट सम्भव नभएका कारण यस वर्ष हामीले नयाँ आवेदकहरूको मूल्यांकन गर्न पाउने छैनौं,’ उनले भनेका थिए ।

ब्रिटिस आर्मी र सिंगापुर पुलिस फोर्समा भर्ती छनोटका निम्ति धरान र पोखरामा रजिस्ट्रेसन फारम भराएर क्षेत्रीय छनोट गरिन्थ्यो । क्षेत्रीय छनोटमा परेकाहरूलाई पोखरामा केन्द्रीय तथा अन्तिम छनोटमा प्रतिस्पर्धा गराउने गरिन्छ । कोभिड–१९ ले गर्दा यो पटक इन्टेक–२०२० केन्द्रीय छनोट स्पर्धाबाट बाहिरिएका युवालाई मात्र अवसर दिइएको छ ।

पोखरामा हुने केन्द्रीय छनोटमा शारीरिक छनोटमा २ हजार मिटर दौड, १५ किलोको डोको बोकाइ, २० किलोको बोरा उचालेर बोक्ने, ४ किलोको मेडिसिन बल थ्रो फ्ँयाक्ने लगायत पर्दछन् । शैक्षिक छनोटमा अंग्रेजी भाषातर्फ सुनाइ, बोलाइ, लेखाइ, पढाइ, गणित हिसाब, मेडिकल टेस्ट र अन्तिम अन्तर्वार्ता हुने गरेको छ ।

‘इन्टेक–२०२०’ मा प्रतिस्पर्धीमध्ये अन्तिम चरणबाट करिब २ हजार ५ सय जना बाहिरिएको अनुमान गरिएको छ । त्यसमध्ये एनआरए नो री–एप्लाई पुन आवेदन दिन नपाउनेमा परेकाले भर्ती हुन पाउने पर्ने छैनन् । गत वर्षको रेकर्डअनुसार पुनः आवेदन दिन नपाउने एनआरएमा परेका पूर्वबाट २ सय ४७ र पश्चिमबाट ३ सय २४ जना छन् ।