गजेन्द्र नारायण र छिन्नमस्ताका पाँच स्वास्थ्यकर्मी संक्रमित, अस्पतालको सेवा बन्द

◊ धीरुभाइ
२३ साउन, सप्तरी । स्वास्थ्यकर्मीहरुमा काेराेना भाइरस संक्रमण भेटिएपछि राजविराज स्थित गजेन्द्र नारायण सिंह अस्पतालको शुक्रबार सेवा बन्द गरेको छ । एकै दिन पाँच स्वास्थ्यकर्मीसहित १८ जनामा कोरोना संक्रमण भेटिएको छ ।
गजेन्द्र नारायण सिंह अस्पतालका निमित मेडिकल सुपरिटेन्डेन्ट डा. रणजीत कुमार झाका अनुसार संक्रमति स्वास्थ्यकर्मीहरुलाई आइसोलेसनमा भर्ना गरेपछि र संक्रमितको सिधा सम्पर्कमा आएका अस्पतालका स्वास्थ्यकर्मी, कर्मचारीसहित २७ जनालाई क्वारेन्टाइनमा बसाउनु पर्दा सेवा बन्द गर्नु परेको छ । आज दिनभरी सेवा बन्द गरेर स्वास्थ्यकर्मी व्यवस्थापन गरी भोलीबाट सेवा सुचारु गरिने तयारीमा लागेको उनले बताए ।

थपिएकासहित गजेन्द्र नारायण सिंह अस्पतालमा संक्रमित स्वास्थ्यकर्मीको संख्या नौ पुगेको छ । यसअघि पाँच जना स्वास्थ्यकर्मीहरुमध्ये दुई जना निको भएर घर फर्किसकेको अस्पतालका निमित्त मेडिकल सुपरिटेन्डेन्ट डा. झाले भने, अहिले सात जना स्वास्थ्यकर्मीहरु आइसोलेसनमा भर्ना छन ।

बिहीबार राती आएको रिपोर्टमा गजेन्द्र नारायण सिंह अस्पताल राजविराजको इमर्जेन्सी वार्डका चार जना र छिन्नमस्ता अस्पतालका एक हेल्थ असिस्टेन्टसहित पाँच जना स्वास्थ्यकर्मीमा कोरोना संक्रमण भेटिएको स्वास्थ्य कार्यालय सप्तरीका निमित प्रमुख दुनियालाल यादवले बताए ।

यस्तै सोही रिपोर्टमा छिन्नमस्ता गाउँपालिका ५ का दुई जना उमेर नखुलेका पुरुष, वडा नम्बर ४ का २५ वर्षीया महिला, राजविराज नगरपालिकाको वडा नखुलेका स्वास्थ्यकर्मीहरु ४०, ४०,३१ र ३८ वर्षीय पुरुष, राजविराज ४ का ३३ वर्षीय पुरुष र ५५ वर्षीया महिलामा कोरोना संक्रमण देखिएको बताइएको छ ।

त्यसैगरी, रुपनी गाउँपालिका ६ का २४ वर्षीय पुरुष, महादेवा गाउँपालिका २ का ३७,३७, ३६ र ३४ वर्षीय पुरुष, तिलाठी कोइलाडी गाउँपालिका २ का उमेर नखुलेका तीन जना पुरुष र वडा नम्बर ७ का उमेर नखुलेका एक जना पुरुषमा कोरोना पुष्टि भएको स्वास्थ्य कार्यालय सप्तरीले जनाएको छ ।

जिल्लामा कोरोना संक्रमितको संख्या ५५७ पुगेको छ भने ३८३ जना निको भएर घर फर्किसकेका छन । आइसोलेसनमा १०४ जना उपचाररत भर्ना छन । अहिलेसम्म दुई जनाको मृत्यु भइसकेको छ ।