संक्रमणको जस्तै लक्षण देखिएका दुई जनाको मृत्यु, कोरोना पुष्टि हुन बाँकी

२५ साउन, जनकपुरधाम । धनुषामा कोरोना भाइरस संक्रमणको जस्तै लक्षण देखिएका  दुई जना पुरुषको मृत्यु भएको छ। मृत्यु हुनेमा एक जना अस्पतालका सुरक्षा गार्ड र अर्का नेपाली कांग्रेसका नेता रहेका छन ।

उनीहरूमा केही दिनदेखि रुघाखोकी, टाउको दुख्ने जस्ता लक्षण देखा परेकाे थियाे । धनुषाको मिथिला बिहारी नगरपालिका–५ घर भई जनकपुरधाम उपमहानगरपालिका–२ कदम चोकस्थित बिनय तारा फाउण्डेशन क्यान्सर अस्पतालमा सेक्युरिटी गार्डको काम गर्दै आएका ४५ वर्षीय पुरुषको मृत्यु भएको छ ।

यस्तै, धनुषाकै शहीद नगरपालिका–८ का ५० वर्षीय पुरुषको पनि जनकपुरधामस्थित काव्य अस्पतालमा उपचारका क्रममा मृत्यु भएको छ । श्वास प्रश्वासमा समस्या देखिएपछि उनलाई अस्पतालमा भर्ना गरिएको थियो ।

उपचारकै क्रममा मृत्यु भएका उनको पनि स्वाब संकलन गर्ने काम भइरहेको प्रमुख जिल्ला अधिकारी भट्टराईले जानकारी दिए । मृत्यु भएका पुरुष नेपाली कांग्रेसका नेता हुन् ।

धनुषामा यसअघि एक जनाको कोरोना संक्रमित भएर मृत्यु भइसकेको छ । दुई साताअघि शहीदनगरपालिका ८ का ३६ वर्षीय पुरुषको कोरोना संक्रमणले मृत्यु भएको थियो ।