कोरोनाले आज एकैदिन १० जनाको मृत्यु

२८ साउन, काठमाडौं । कोरोना भाइरसको संक्रमणबाट आज एकैदिन १० जनाको मृत्यु भएको छ । नेपालमा कोरोनाले मृत्यु भएको यो अहिलेसम्मकै ठूलो संख्या हो । यअघि एकैदिन ६ जनासम्मको मृत्यु भएको थियो ।

तर बुधबार बिहानदेखि यो समाचार तयार पार्दासम्म १० जनाको कोरोनाकै कारण मृत्यु भएको पुष्टि भएको छ । काठमाडौँमा मात्रै कोरोनाले तीन जनाको मृत्यु भएको छ ।

किस्ट अस्पतालमा दुई जना, पाटन अस्पतालमा एक जनाको मृत्यु भएको हो । टेकुकी ७८ वर्षीया महिलाको मंगलबार राति किस्ट अस्पतालमा मृत्यु भएको हो । ज्वरो र झाडावान्ता भएपछि पाटन अस्पताल हुदै किस्ट अस्पताल पुर्याएकी उनको मंगलबार मध्यराती मृत्यु भएको हो ।

यस्तै बारा, कलैयाका ७७ वर्षीय पुरुषको किष्ट अस्पतालमै मृत्यु भएको छ । २६ गते त्रिवि शिक्षण अस्पतालबाट रिफर भएर किष्ट पुगेका उनको मृत्युपछि संक्रमण संक्रमण पुष्टि भएको हो । यस्तै जनकपुरकी २८ वर्षीय महिलाको पाटन स्वास्थ्य विज्ञान प्रतिष्ठानमा उपचारका क्रममा मृत्यु भएको छ । उनी १८ गते अस्पताल भर्ना भएकी थिइन् ।

यस्तै जनकपुरका ७२ वर्षीय पुरुषको मेडिसिटी अस्पतालमा उपचारका क्रममा मृत्यु भएको छ । श्वासप्रश्वासमा समस्या आएपछि हेलिकप्टर चार्टर गरेर अस्पताल ल्याइएका उनको एक सातादेखि भेन्टिलेटरमा उपचार गरिएपनि बुधबार मृत्यु भएको हो ।

ह्याम्स अस्पतालमा मंगलबार मृत्यु भएका धादिङको नीलकण्ठ नगरपालिका–१४ धुँवाकोटका ३२ वर्षीय पुरुषमा पनि संक्रमण पुष्टि भएको छ । रुघाखोकी र ज्वरो आएपछि २४ गतेनजिकै रहेको गनेडाँडा स्वास्थ्य चौकी पुगेका उनी भोलिपल्ट जिल्ला अस्पताल गएका थिए ।

यस्तै कपिलवस्तु नगरपालिका–२ तौलिहवाका ४२ वर्षीय पुरुषको कोरोना विशेष अस्पताल, बुटवलमा मंगलबार राति मृत्यु भएको छ ।

यस्तै सप्तरीको डाक्नेश्वरी–८ घर भई राजविराज ६ मा बस्ने ७२ वर्षका संक्रमितको मंगलबार राति मृत्यु भएको छ । चार दिनदेखि ज्वरो आएका उनलाई कोरोना संक्रमण भएको मंगलबार पुष्टि भएको थियो । त्यही दिन साँझ उनको आइसोलेसन सेन्टर लैजाने क्रममा एम्बुलेन्समै मृत्यु भएको हो ।

मोरङ, बुढीगंगा गाउँपालिका २ का ५५ वर्षका पुरुषको बीपी कोइराला स्वास्थ्य विज्ञान प्रतिष्ठान, धरानमा उपचारका क्रममा बुधबार विहान मृत्यु भएको छ ।

यस्तै सोमबार राम जानकरी अस्पतालमा उपचारका क्रममा मृत्यु भएका महोत्तरीको मटिहानी नगरपालिका–६ का ५२ वर्षीय पुरुषमा पनि संक्रमण पुष्टि भएको छ ।

मंगलबार दिउँसो वीरगञ्ज–१६ नगवास्थित सडकमा मृत भेटिएका बाराको बिश्रामपुर–५ का ३८ वर्षीय पुरुषमा पनि कोरोना संक्रमण पुष्टि भएको छ । यससँगै नेपालमा कोरोना भाइरसबाट एकैदिन १० जनाको मृत्यु भएको पुष्टि भएको हो । यससँगै नेपालमा कोरोनाबाट मृत्यु हुनेको संख्या ९२ पुगेको छ ।

यसले नेपालमा कोरोना भाइरस भयावह हुदै गएको देखाएको छ । बुधबार मात्रै १० हजार जनाको परीक्षण गर्दा ४ सय ८४ जनामा संक्रमण देखिएको छ । यससँगै नेपालमा कोरोना संक्रमितको संख्या २४ हजार ४३२ पुगेको छ ।

उनीहरु १६ हजार ७२८ जना निको भएर घर फर्किएका छन् भने ९२ जनाले ज्यान गुमाउनु परेको छ । पछिल्लो समय काठमाडौंमा तिब्र गतिमा कोरोना फैलिरहेको छ ।