आज ६ सय ४१ जनामा कोरोना संक्रमण

३२ साउन, काठमाडौं । आइतबार नेपालमा ६ सय ४१ जनामा कोरोना भाइरस संक्रमणको पुष्टि भएको छ । स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार पछिल्लो २४ घण्टामा सो संख्याका संक्रमित थपिएका हुन् ।

याे सँगै हालसम्म संक्रमितको संख्या २६ हजार ६ सय ६० पुगेको छ। त्यस्तै विगत २४ घण्टामा १ सय ३४ जना निको भइ घर फर्किएको प्रवक्ता गौतमले बताए। आज निको हुनेसहित हालसम्म १७ हजार ३ सय ३५ जना कोरोनाबाट मुक्त भएका छन्। देशभर सक्रिय संक्रमितको संख्या ९ हजार २ सय २१ छ।

त्यस्तै १ सय ४ जनाको कोरोनाबाट मृत्यु भएको तथ्यांक छ। विगत २४ घण्टामा थप दुई जना मृतकमा कोरोना पुष्टि भएको हो। विगत २४ घण्टामा १२ हजार २ सय बढीको पिसिआर परीक्षण भएको छ। हालसम्म ५ लाख १७ हजार बढीको पीसीआर परीक्षण भएको मन्त्रालयले जनाएको छ।