भानुका २४ जनामा कोरोना पुष्टि, एकै दिन १२७ को स्वाब सङ्कलन

२ भदौ, दमौली । तनहुँको भानु नगरपालिकाका २४ जनामा कोरोना पुष्टि भएपछि सोमबार एकै दिन १२७ जनाको स्वाब सङ्कलन गरिएको छ । कोरोना सङ्क्रमितको सम्पर्कमा आएका व्यक्तिको पहिचान गरी नगरपालिकाले उनीहरुको स्वाब सङ्कलन गरेको हो ।

नगरपालिकाका स्वास्थ्य शाखा प्रमुख ऐश्वर्यचन्द्र भट्टराईले भानु नगरपालिका–२, ३, ४, ५ र ८ का व्यक्तिको स्वाब सङ्कलन गरिएको जानकारी दिए । उनका अनुसार स्वाब सङ्कलनका लागि पाँच स्वास्थ्यकर्मी खटिएका थिए । सोमबार अबेरसम्म उनीहरुको स्वाब सङ्कलन गरिएको थियो । “भानुमा एकैचोटि ठूलो सङ्ख्यामा समुदायका व्यक्तिमा कोरोना पुष्टि भएपछि सम्पर्कमा आएकाहरुको पहिचान गरी स्वाब सङ्कलन गरी परीक्षणका लागि पोखरा पठाएका छौँ”, उनले भने।

भानु नगरपालिका–१ का ३४ वर्षीय एक व्यक्तिमा गत सोमबार कोरोना पुष्टि भएको थियो । त्यसलगत्तै नगरपालिकाले १२२ को स्वाब सङ्कलन गरी परीक्षण गराएकामा २२ जनालाई सङ्क्रमण पुष्टि भयो । बन्दीपुर गाउँपालिकाको समन्वयमा गरिएको परीक्षणमा भानु नगरपालिकाकै थप एक जनालाई कोरोना पुष्टि भएको थियो । नगरपालिकाका जनप्रतिनिधि, इञ्जिनीयरलगायत कोरोनाबाट सङ्क्रमित छन् ।

व्यासका दुई महिलामा कोरोना सङ्क्रमण

तनहुँको व्यास नगरपालिकाका दुई महिलामा कोरोना सङ्क्रमण पुष्टि भएको छ । गण्डकी प्रदेश स्वास्थ्य निर्देशनालयले सोमबार राति ८ बजे सार्वजनिक गरेको विवरणअनुसार व्यास नगरपालिका–१ का ३१ र २३ वर्षीया महिलामा कोरोना सङ्क्रमण पुष्टि भएको हो ।

व्यास नगरपालिका–१ का एकै परिवारका पाँच जनामा पोखरामा गरिएको परीक्षणमा कोरोना पुष्टि भएपछि नगरपालिकाले शनिबार १०२ जनाको स्वाब सङ्कलन गरेको थियो । त्यसमध्ये ९५ जनाको रिपोर्ट सोमबार दिउँसो नेगेटिभ आएको थियो । “राति अबेरमात्रै दुई सङ्क्रमित भएको प्रदेशको विज्ञप्ति आयो, यसबारे रुजु गरेर मात्रै विस्तृतमा भन्न सकिन्छ”, नगरपालिकाका स्वास्थ्य शाखा प्रमुख प्रमोद सोतीले भने ।