झण्डा जलाउने दोर्जे तामाङसहित ९ जना पक्राउ, थप अनुसन्धान शुरु

३ भदौ, काठमाडौं । नेपाल प्रहरीले राष्ट्रिय झण्डा जलाउने मुख्य व्यक्ति गाल्जेन दोर्जे तामाङसहित सबै ९ जनालाई नै पक्राउ गरेको छ । राष्ट्रिय झण्डा जलाएर देशद्रोही गीत गाउने तथा भिडियो बनाउने दोर्जेसहित ९ जनालाई नै पक्राउ गरिएको नेपाल प्रहरीले जनाएको छ । यो गीत लेख्ने, गाउने र भिडियो बनाउने तथा राष्ट्रिय झण्डा जलाउने सबै योजनाकार नै उनी हुन् ।

सोमबार उनीहरुले देशद्रोही बोलको गीतमा राष्ट्रिय झण्डा जलाएको दृश्यसहितको म्युजिक भिडियो सार्वजनिक गरेका थिए । सार्वजनिक गरिएको गीतको भिडियोमा राष्ट्रिय झण्डा जलाएपछि त्यसको चौतर्फी विरोध भएको थियो । विरोधसँग दोषीमाथि कडा कारबाही गर्नुपर्ने आवाज समेत उठेको थियो ।

बुधबार बिहान शुरुमा चार, त्यसपछि थप दुई, त्यसपछि थप ३ जना गरी ९ जना पक्राउ परेका हुन् । एक जना भने यसअघि हिजो नै पक्राउ परेका थिए । उनीहरुमाथि थप अनुसन्धान शुरु गरिएको छ ।

नेपालको राष्ट्रियतामाथि आँच आउने, झण्डा जलाउने, अपमान हुने काम गरेमा मूलूकी अपराध संहिता २०७४, मलुकी फौजदारी कार्यविधि संहिता २०७४ को दफा १५१ उपदफा १ को कसुरमा उपदफा २ अनुसार ३ बर्ष जेल सजाय वा ३० हजार रुपैयाँसम्म जरिवाना वा दुबै सजाय हुन सक्ने कानुनी व्यवस्था छ ।