राजविराजका मृतक युवकमा कोरोना पुष्टि, मृतकको संख्या चार पुग्यो

◊ धीरुभाइ

४ भदौ सप्तरी । गत मंगलबार मृत्यु भएका राजविराजका एक युवकमा कोरोना संक्रमण पुष्टि भएको छ । राजविराज वडा नं. ४ का २८ वर्षीय युवकमा कोरोना संक्रमण पुष्टि भएको हो । यससँगै जिल्लामा कोरोना संक्रमणबाट मृत्यु हुनेको संख्या चार पुगेको छ ।

सो दिन ज्वरो आएर श्वासप्रश्वासमा समस्या भएपछि तत्कालै उपचारका लागि राजविराजस्थित छिन्नमस्ता अस्पताल लगिएको थियो । अवस्था गम्भीर रहेको भन्दै सो अस्पतालले धरान स्थित बीपी कोइराला स्वास्थ्य विज्ञान प्रतिष्ठान घोपामा रेफर गरेको थियो । त्यहाँ पुगेको केहीक्षणमै मंगलबार दिउँसो युवकको मृत्यु भएको थियो ।

मृत्युपछि युवकको शव राजविराज ल्याइएपछि गजेन्द्र नारायण सिंह अस्पतालले स्वाब संकलन गरिएको थियो । गएराती आएको स्वाबको रिपोर्टमा कोरोना पोजेटिभ देखिएको स्वास्थ्य कार्यालय सप्तरीका निमित प्रमुख दुनियालाल यादवले बताए ।

युवकको स्वाब संकलन पश्चात संस्कार पनि गरिसकेको छ । उनको सम्पर्कमा आएका परिवारका सदस्य तथा संस्कारमा संलग्न व्यक्तिहरुलाई क्वारेन्टाइन गरिएको स्वास्थ्य कार्यालय सप्तरीका निमित प्रमुख यादवले ती सबै मानिसहरुको स्वाब संकलन गरी कोरोना परीक्षण गरिने तयारी भइरहेको बताए ।

यसअघि साउन १ गते राजविराज नगरपालिका वार्ड नम्बर ६ का ७३ वर्षीय बृद्ध ब्यापारी पुरुष, साउन २१ गते राती रुपनी गाउँपालिका ५ गढिया धुरगामका ४५ वर्षीय पुरुष र साउन २८ गते जिल्लाको डाकनेश्वरी नगरपालिका ८ भिमपुर स्थायी घर भई राजविराज नगरपालिका वार्ड नम्बर ६ सिरहारोड बसोबास गर्दै आएका ७२ वर्षीय बृद्धको कोरोना संक्रमणका कारण मृत्यु भएको थियो ।