आज कर्णालीमा ३३ जनालाई कोरोना, संक्रमितको संख्या २१६३ पुग्याे

४ भदौ, सुर्खेत । कर्णाली प्रदेशमा पछिल्लो २४ घण्टामा कर्मचारी, सुरक्षाकर्मी र कामदारसहित ३३ जनालाई कोरोना भाइरस ‘कोभिड-१९’काे पुष्टि भएको छ ।

सुर्खेतस्थित प्रदेश अस्पताल, पशुपन्छी रोग अन्वेषण प्रयोगशाला र दैलेख अस्पताल प्रयोगशालामा गरिएको परीक्षणबाट बिहीबार थप ३३ जनामा संक्रमण पुष्टि भएको हो ।

आज थपिएका संक्रमितमध्ये ७ जना सरकारी भवन निर्माणमा संलग्न कर्मचारी, तीनजना सुरक्षाकर्मी, एकजना बित्तीय संस्थाका कर्मचारी, एकजना निजी संस्थाका कम्प्युटर अपरेटरसहित वीरेन्द्रनगरका मात्रै १४ जना रहेका छन । अहिले ती कार्यालयहरु केही दिनका लागि शिल गरेर ‘कन्ट्याक्ट ट्रेसिङ्ग’ गर्ने काम भैरहको छ ।

बिहीबार थपिएका संक्रमितमध्ये जिल्लागत विवरणअनुसार दैलेखका १८ जना, बाँके र पर्साका तीनरतीनजना, बाराका दुईजना, सुर्खेत, कालीकोट, जाजरकोट, रुकुम पश्चिम, अछाम, मोहतरी र काठमाण्डौंका एक र एक जना रहेका छन । यससँगै कर्णाली प्रदेशमा कोरोना संक्रमितको संख्या २१६३ पुगेको छ ।

यस्तै, कर्णालीमा बिहीबार थप १३ जना कोरोना संक्रमित डिस्चार्ज भएका छन् । यससंँगै प्रदेशमा डिस्चार्ज हुनेको संख्या १९४५ पुगेको स्वास्थ्य महाशाखाले जनाएको छ । कर्णालीमा हालसम्म ६ जना कोरोना संक्रमितको मृत्यु भएको छ भने २१२ जना सक्रिय संक्रमित आइसोलेसनमा रहेका छन् ।