कोरोनाले बारामा थप एक पुरुषको मृत्यु

४ भदौ, वीरगञ्ज । बाराको कलैया उपमहानगरपालिका–१० मटिअर्वाका एक पुरुषको कोरोनाले मृत्यु भएको छ । स्थानीय ५९ वर्षीय पुरुषको कोरोना संक्रमणबाट मृत्यु भएको हो ।

बुधबार राति ११ बजेतिर अचानक श्वास प्रश्वासमा समस्या भएपछि उनलाई उपचारका लागि वीरगञ्जस्थित नारायणी अस्पताल पुर्‍याइएको थियो । अस्पतालमा पुर्‍याएलगत्तै उनको मृत्यु भएको हो ।

नारायणी अस्पतालका चिकित्सक डा. उदय नारायण सिंहका अनुसार बिरामीलाई अस्पताल ल्याइए पुर्‍याइको भएपनि उपचार भने गर्न नभ्याइएको बताए ।

मृत्युपछि स्वाब संकलन गरी परीक्षण गर्दा पीसीआर परीक्षण रिपोर्ट पोजेटिभ आएको जानकारी नारायणी अस्पतालले दिएको छ । यससँगै बारामा कोरोनाबाट मृत्यु हुनेको संख्या ५ पुगेको छ।