पाटन अस्पतालमा दुई कोरोना संक्रमितको मृत्यु

५ भदौ, काठमाडौं । ललितपुरको पाटन अस्पतालमा दुई जना कोरोना संक्रमितको मृत्यु भएको छ । जिल्ला कोभिड–१९ संकट व्यवस्थापन केन्द्र, ललितपुरका अनुसार अस्पतालमा उपचारारत दोलखा र सर्लाहीका संक्रमितको मृत्यु भएको हो ।

भदौ २ गतेदेखि पाटन अस्पतालमा भर्ना भएकी दोलखाकी ३० वर्षीया महिलाको शुक्रबार उपचारकै क्रममा मृत्यु भएको हो । यस्तै साउन ३० गते पाटन अस्पतालमा उपचारका लागि भर्ना भएका सर्लाहीको मलंगवा निवासी ४६ वर्षीय पुरुषको पनि शुक्रबार मृत्यु भएको केन्द्रले जानकारी दिएको छ ।

शुक्रबार मात्रै प्युठानका संक्रमितको बुटवलमा मृत्यु भएको थियो । पछिल्लो समय दैनिक कोरोना मृत्तकको संख्या बढिरहेको छ ।